४ वेळा SSC, दोनदा UPSC दिली, आजारपणातही जिद्द नाही सोडली, शेतकऱ्याचा मुलगा बनला CBI अधिकारी

प्रत्येक अडचणीवर मात करून खंबीरपणे उभे राहण्याची कला अवगत असलेली व्यक्तीच आयुष्यात पुढे जाते आणि यश मिळवते. हरियाणातील महेंद्रगड जिल्ह्यातील नारनौल येथील मोहित यादव याची यशोगाथा याचेच मोठे उदाहरण आहे.

गावाच्या वाटेवरून चालत पुढे जात देशातील सर्वात प्रतिष्ठित तपास संस्था केंद्रीय अन्वेषण ब्युरो (CBI) मध्ये सामील होण्यापर्यंतचा त्याचा प्रवास सोपा नव्हता. त्याची आर्थिक परिस्थिती फारशी चांगली नव्हती, त्याला आयुष्यात अनेक चढ-उतारांचा सामना करावा लागला

मोहितवर या काळात शस्त्रक्रियाही झाली. तरीही त्याने कधीच हार मानली नाही आणि आज त्याची कहाणी देशातील त्या तरुणांसाठी प्रेरणादायी आहे जे संघर्षातून आपली स्वप्ने पूर्ण करण्यासाठी झटत असतात. मोहित यादव उत्तर प्रदेशातील एका मध्यमवर्गीय शेतकरी कुटुंबातील होता, जिथे सोयीसुविधा मर्यादित होत्या.

वीज, इंटरनेट आणि चांगले शिकवणी वर्ग यांसारख्या मूलभूत सुविधांचा खूप अभाव होता. तरीही त्याच्या आई-वडिलांनी मुलाच्या शिक्षणासाठी शक्य ते सर्व काही केले. मोहित यादवने आपले शालेय शिक्षण हरियाणात सुरू केले. तो २०१७ मध्ये बारावीच्या बोर्ड परीक्षेत उत्तीर्ण झाला आणि पुढील शिक्षणासाठी दिल्लीला गेला.

तिथे त्याने दिल्ली विद्यापीठाच्या हिंदू कॉलेजमध्ये प्रवेश घेतला आणि २०२० मध्ये पदवी मिळवली. कॉलेज सोडल्यानंतर लगेचच त्याने सरकारी नोकरी मिळवण्यासाठी तयारी सुरू केली. सुरुवातीला UPSC CDS, CAPF आणि भारतीय हवाई दलाच्या AFCAT परीक्षा उत्तीर्ण करणे हे त्याचे ध्येय होते.

सरकारी नोकरी मिळवण्याचा प्रवास कधीच सोपा नसतो आणि मोहितसाठी तो आव्हानांनी भरलेला होता. त्याला २०२१ मध्ये शस्त्रक्रिया आणि २०२२ मध्ये किडनी स्टोनसारख्या आव्हानांना सामोरे जावे लागले. तरीही मोहित खचला नाही. आजारी असूनही त्याने आपला उत्साह टिकवून ठेवला आणि स्पर्धा परीक्षांची तयारी सुरू ठेवली.

आजारी असतानाही त्याचे संपूर्ण लक्ष स्पर्धा परीक्षांच्या तयारीवर होते. लहानपणापासून मोहितने आपल्या वडिलांना शेतात राबताना पाहिले होते. त्याचे कुटुंब पूर्णपणे शेतीवर अवलंबून होते आणि संसाधने मर्यादित होती. त्याने याच परिस्थितीला आपली ताकद बनवले.

जवळपास तीन वर्षांच्या कठोर परिश्रमानंतर आणि सेल्फ स्टडीनंतर मोहितने एसएससी सीजीएल (SSC CGL) परीक्षा दिली आणि २०२३ मध्ये त्याच्या मेहनतीचे फळ मिळाले. त्याची आयकर अधिकारी पदासाठी निवड झाली पण त्याचा प्रवास पुढे चालूच राहिला.

आयकर अधिकारी झाल्यानंतरही त्याने आणखी मोठ्या सरकारी नोकरीची तयारी सोडली नाही. त्याने UPSC CAPF परीक्षा दोनदा उत्तीर्ण केली आणि त्याच्या अथक तयारीमुळे ते अधिकच सक्षम झाले. मोहितने कठोर परिश्रमाच्या जोरावर २०२४ मध्ये पुन्हा SSC CGL परीक्षा उत्तीर्ण केली आणि CBI मध्ये इन्स्पेक्टर बनले.

मोहित यादव याच्या अधिकृत माहितीनुसार त्याने एसएससी सीपीओ परीक्षा दोनदा, यूपीएससी सीएपीएफ परीक्षा दोनदा आणि एसएससी सीजीएल परीक्षा दोनदा उत्तीर्ण केली आहे. तसेच त्याने यूपीएससी सीडीएस परीक्षा आठ वेळा, एएफसीएटी परीक्षा चार वेळा आणि आयबीपीएस परीक्षा चार वेळा दिली आहे. चिकाटी ही यशाची गुरुकिल्ली आहे हेच मोहित यादव याची कहाणी आपल्याला शिकवते.