Bhandara News | Latest Bhandara News in Marathi | Bhandara Local News Updates | ताज्या बातम्या भंडारा | भंडारा समाचार | Bhandara Newspaper

आंधळगाव : ग्रामपंचायतीमध्ये झालेल्या गैरप्रकारात दोषी आढळलेल्यांवर कारवाई करण्याच्या मागणीसाठी मोहाडी तालुक्यातील आंधळगाव येथे प्रजासत्ताक दिनी एका व्यक्तीने पाण्याच्या टाकीवर चढून शोले स्टाईल आंदोलन सुरू केले. तब्बल सहा तासांनंतर त्याला खाली उतरविण्यात यश आले.किरण हरिभाऊ सातपुते असे आंदोलन करणाऱ्याचे नाव आहे. प्रजासत्ताक दिनी पहाटे ५ वाजता गावातील उंच टाकीवर तो चढून बसला. ग्रामपंचायतीमध्ये झालेल्या गैरप्रकार प्रकरणी दोषी आढळून आलेल्या व्यक्तींवर कारवाई करावी, अशी मागणी तो करीत होता. प्रजासत्ताक दिनाच्या ध्वजारोहणाच्या तयारीत असलेल्या गावकऱ्यांना हा प्रकार दिसला. त्यांनी पाण्याच्या टाकीकडे धाव घेतली. त्याला खाली येण्यासाठी आवाहन करू लागले. या घटनेची माहिती पोलिसांना देण्यात आली. पोलीसही तत्काळ घटनास्थळी दाखल झाले. उंच टाकीवरून किरण आपल्या मागण्या मांडत होता. दरम्यान, गटविकास अधिकारी रवींद्र वंजारी, उपविभागीय पोलीस अधिकारी संतोष सिंग बिसेन घटनास्थळी दाखल झाले. तब्बल सहा तासांच्या प्रयत्नांनंतर त्याला खाली उतरविण्यात यश आले. यावेळी गावकऱ्यांची मोठी गर्दी झाली होती.आंधळगाव ग्रामपंचायतीमध्ये काही महिन्यांपूर्वी गैरप्रकार झाला होता. त्याबाबतची तक्रार किरण सातपुते यांनी केली होती. त्यावरून चौकशीही झाली. चौकशीत दोषी आढळलेल्या व्यक्तींकडून वसुली झाली. मात्र, कोणतीच कारवाई करण्यात आली नाही, असा आरोप किरण सातपुते करीत होता. या आंदोलनाने गावात काही काळ खळबळ उडाली होती.गुन्हा दाखलपाण्याच्या टाकीवर चढून आत्मदहनाचा इशारा देणाऱ्या किरण सातपुते (४८) रा. आंधळगाव याच्याविरुद्ध आंधळगाव पोलीस ठाण्यात भादंवि ३०९ कलमान्वये गुन्हा दाखल करण्यात आला आहे. या घटनेचा तपास हवालदार बाभरे करीत आहेत.

Bhandara (Marathi News)