CoronaVirus: युद्ध जिंकणार! डिसेंबरपर्यंत बाजारात कोरोनाची लस येणार, चीनचा दावा

CoronaVirus : या वर्षाच्या अखेरीस किंवा पुढच्या वर्षाच्या सुरुवातीस ही लस बाजारात येऊ शकते, असे एसएएसएसीने म्हटले आहे.

कोरोनाच्या संक्रमणाचा जगभरात फैलाव करणाऱ्या चीननंच आता एक आनंदवार्ता दिली आहे.

चीननिर्मित कोरोना लस या वर्षाच्या अखेरीस बाजारात येऊ शकते, असा दावा सरकारच्या मालमत्ता पर्यवेक्षण आणि प्रशासन आयोगाने (एसएएसएसी) केला आहे.

रॉयटर्सच्या वृत्तानुसार, एसएएसएसीने चिनी सोशल मीडिया प्लॅटफॉर्म असलेल्या वेचॅटच्या माध्यमातून ही माहिती दिली आहे.

अहवालानुसार वुहान इन्स्टिट्यूट ऑफ बायोलॉजिकल प्रॉडक्ट्स आणि बीजिंग इन्स्टिट्यूट ऑफ बायोलॉजिकल प्रॉडक्टने ही लस तयार केली आहे.

चाचणीदरम्यान 2000 लोकांना ही लस देण्यात आली होती. या वर्षाच्या अखेरीस किंवा पुढच्या वर्षाच्या सुरुवातीस ही लस बाजारात येऊ शकते, असे एसएएसएसीने म्हटले आहे.

ही लस क्लिनिकल चाचणीच्या दुस-या टप्प्यात पोहोचली आहे. वुहान इन्स्टिट्यूट ऑफ बायोलॉजिकल प्रॉडक्ट्स आणि बीजिंग इन्स्टिट्यूट ऑफ बायोलॉजिकल प्रॉडक्ट्स हे सरकारच्या फार्मास्युटिकल ग्रुप सिनोफार्माशी संबंधित आहेत.

एसएएसएसी सिनोफार्माच्या व्यवस्थापनावर देखरेख ठेवते.

अहवालानुसार, बीजिंग इन्स्टिट्यूट ऑफ बायोलॉजिकल प्रॉडक्ट्स एका वर्षात 10 ते 12 कोटी डोस लस तयार करू शकते. चीनमध्ये एकूण 5 कोरोना विषाणूच्या लसींवर चाचण्या सुरू आहेत.

परंतु बीजिंग इन्स्टिट्यूट ऑफ बायोलॉजिकल प्रॉडक्ट्सने तयार केलेल्या लसीवर इतर कोणत्याही कंपनीने प्रतिक्रिया दिलेली नाही.

अमेरिकेची मॉडर्ना कंपनी आणि ब्रिटनच्या ऑक्सफोर्ड युनिव्हर्सिटीने तयार केलेल्या कोरोना लशीलासुद्धा प्राथमिक चाचणीत यश मिळाले आहे.