‘ही’ आहे पाकिस्तानची हायस्पीड ट्रेन, किती वेगाने जाते? वंदे भारत ट्रेनला देते का टक्कर? पाहा

Pakistan High Speed Train Vs India Vande Bharat Express: पाकिस्तानची सर्वाधिक वेगवान ट्रेन कोणती? कोणत्या मार्गावर धावते? भारतातील वंदे भारत ट्रेनला टक्कर देऊ शकते का? जाणून घ्या...

भारतात वंदे भारत एक्स्प्रेस, गतिमान एक्स्प्रेस आणि नमो भारत एक्सप्रेस यांसारख्या ट्रेनमुळे अंतर लक्षणीयरीत्या कमी झाले आहे. ताशी १५० कि.मी.हून जास्त वेगाने धावणाऱ्या या ट्रेनमुळे लोकांना त्यांच्या गंतव्यस्थानी सहज आणि लवकर पोहोचता येते.

या भारतीय रेल्वेगाड्यांच्या वेगाबद्दल माहिती असेल, पण शेजारील पाकिस्तानमधील रेल्वेची स्थिती कशी आहे हे माहिती आहे का? भारतासोबतच स्वातंत्र्य मिळालेल्या पाकिस्तानमधील सर्वांत वेगवान ट्रेन कोणती आहे? भारताच्या 'वंदे भारत'सारखी अत्याधुनिक ट्रेन पाकिस्तानकडे आहे का?

पाकिस्तानचे रेल्वे जाळे भारताच्या तुलनेत खूपच कमकुवत आहे. पाकिस्तानचे रेल्वे जाळे अंदाजे ७,७०० ते ७,८०० किलोमीटर पसरलेले असून त्याचे संचालन पाकिस्तान रेल्वे करते. तर दुसरीकडे, भारताचे जाळे ६८,००० किलोमीटरपेक्षा जास्त पसरलेले आहे, ज्यामुळे ते पाकिस्तानच्या जाळ्यापेक्षा ८ ते ९ पटीने मोठे आहे.

पाकिस्तानचे रेल्वेमार्ग आणि ट्रेन अजूनही प्रगत नाहीत. काही वृत्तानुसार, पाकिस्तानमधील एक्सप्रेस ट्रेनचा सरासरी वेग ताशी ६०-७० किलोमीटर आहे, तर लाहोर-रावळपिंडी मार्गावर हा वेग ताशी ६५ किलोमीटरपर्यंत पोहोचतो. पाकिस्तानची रेल्वेप्रणाली हा वेग ओलांडत नाही.

पाकिस्तानच्या वेगवान ट्रेनबद्दल बोलायचे झाल्यास, काराकोरम एक्सप्रेस सर्वांत लोकप्रिय आहे. तिचा कमाल वेग ताशी १०५ किलोमीटर आहे, जो भारतीय हाय-स्पीड ट्रेनपेक्षा खूपच कमी आहे. याचा अर्थ असा की, हाय-स्पीड ट्रेनच्या शर्यतीत पाकिस्तान अजूनही मागे आहे.

काराकोरम एक्सप्रेस ट्रेन कराची आणि लाहोर दरम्यान धावते. पाकिस्तानच्या सध्याच्या रेल्वे नेटवर्कवर हा वेग सर्वाधिक मानला जातो. तांत्रिकदृष्ट्या, पाकिस्तानमधील अनेक रेल्वे मार्गांवर ताशी १२० किमी पर्यंतचा कमाल वेग शक्य असला तरी, बहुतेक ट्रेन यापेक्षा कमी वेगाने धावतात.

याव्यतिरिक्त, पाकिस्तानमध्ये ग्रीन लाईन एक्सप्रेस नावाची आणखी एक ट्रेन आहे, जी पाकिस्तानच्या सर्वात वेगवान आणि आधुनिक ट्रेनपैकी एक मानली जाते. तिच्या अत्याधुनिक कोचसाठी आणि कमीत कमी थांब्यांसाठी ओळखली जाणारी ही ट्रेन कराची ते लाहोरचा प्रवास १३ तासांत पूर्ण करते.

वंदे भारत ट्रेनबद्दल बोलायचे झाल्यास, ती ताशी १८३ किलोमीटरचा वेग गाठण्यासाठी तयार करण्यात आली आहे. आतापर्यंत तिचा कमाल वेग ताशी १३० किलोमीटरपर्यंत होता आणि ती सामान्यतः ताशी १०० किलोमीटर वेगाने धावते.

ही ट्रेन अवघ्या काही सेकंदात ताशी १०० किलोमीटरचा वेग गाठू शकते. भारत बुलेट ट्रेनसारख्या प्रकल्पांवरही काम करत असून, त्या लवकरच प्रत्यक्षात प्रवाशांच्या सेवेत येऊ शकतील, असे म्हटले जात आहे. भारतीय रेल्वेची वंदे भारत संकल्पना प्रचंड सुपरहिट झाली आहे.

वंदे भारत ट्रेन भारतीय रेल्वेचा एक नवीन ब्रँड म्हणून उदयास आली आहे. वंदे भारत ट्रेनची सेवा देशभरात सुमारे १६४ मार्गांवर सुरू आहे. वंदे भारत ट्रेन प्रवाशांना हाय-स्पीड कनेक्टिव्हिटी, सुरक्षा व आलिशान सुविधा पुरवते.

वंदे भारत चेअर कार, वंदे भारत स्लीपर या सेवा सुरू असून, वंदे भारत मेट्रोचाही विस्तार करण्याचा मानस रेल्वेचा आहे. यासह आता वंदे भारत कार्गो म्हणजे मालवाहतूक करण्यासाठी वंदे भारत संकल्पनेची मदत घेतली जात आहे.

आताच्या घडीला वंदे भारत ट्रेन ही भारतीय रेल्वेची सर्वाधिक लोकप्रिय ट्रेन आहे. वंदे भारत चेअर कार ट्रेनला प्रवाशांचा चांगला प्रतिसाद मिळत आहे. अनेक वंदे भारत ट्रेनचे कोच वाढवण्यात आले आहेत. यातच पहिल्या वंदे भारत स्लीपर ट्रेनलाही प्रवासी चांगला प्रतिसाद देत आहेत.