Mango Wash Tips: आंबा धुण्याची 'ही' आहे योग्य पद्धत; रसायने आणि उष्णतेचा धोका होईल दूर!

How To Wash Mangoes: बाजारातून आणलेले आंबे थेट खाणे आरोग्यासाठी घातक ठरू शकते.

बाजारातून आंबे आणल्यानंतर सर्वप्रथम ते पिशवीतून बाहेर काढून एका मोठ्या भांड्यात ठेवा. खराब झालेले किंवा जास्त दबलेले आंबे वेगळे करा, जेणेकरून इतर आंबे खराब होणार नाहीत.

आंबे किमान ३० मिनिटे ते २ तासांपर्यंत थंड पाण्यात भिजत ठेवावेत. यामुळे आंब्यातील 'फायटिक ॲसिड' निघून जाण्यास मदत होते, ज्यामुळे शरीरात उष्णता वाढत नाही.

आंब्यावरील रसायने पूर्णपणे काढण्यासाठी पाण्यात थोडे मीठ किंवा पांढरा व्हिनेगर टाका. हे नैसर्गिक क्लिनर म्हणून काम करतात आणि पृष्ठभागावरील जंतू नष्ट करतात.

पाण्यात भिजवल्यानंतर प्रत्येक आंबा हाताने हलक्या हाताने घासून घ्यावा. यामुळे आंब्याच्या देठाजवळ साचलेली घाण आणि चिकटपणा निघून जातो.

भांड्यातील पाण्यातून आंबे काढल्यानंतर ते पुन्हा एकदा नळाच्या वाहत्या स्वच्छ पाण्याखाली धरून धुवावेत. यामुळे उरलेली रसायने किंवा मिठाचा अंश निघून जाईल.

आंबे धुतल्यानंतर ते थेट फ्रीजमध्ये ठेवू नका किंवा खाऊ नका. एका स्वच्छ सुती कापडाने आंबे व्यवस्थित कोरडे करून घ्या. यामुळे आंब्याची साल लवकर खराब होत नाही.

आंबा कापण्यापूर्वी त्याच्या देठाकडचा थोडा भाग कापून टाकावा. या भागात अनेकदा डिंक किंवा रसायने साचलेली असतात, ज्यामुळे घसा खवखवणे किंवा तोंडाला पुरळ येण्याची शक्यता असते.