Nida Khan : HR निदा खानच्या WhatsApp चॅटमधून उलगडणार मोठं रहस्य; कसं व्हायचं कर्मचाऱ्यांचं ब्रेनवॉशिंग?

Nida Khan And TCS : नाशिकमधील टीसीएस (TCS) कंपनीच्या कॅम्पसमध्ये धर्मांतर घडवून आणणाऱ्या गँगचा पर्दाफाश झाल्यानंतर आता राजकीय वातावरण चांगलंच तापलं आहे.

नाशिकमधील टीसीएस (TCS) कंपनीच्या कॅम्पसमध्ये धर्मांतर घडवून आणणाऱ्या गँगचा पर्दाफाश झाल्यानंतर आता राजकीय वातावरण चांगलंच तापलं आहे. या प्रकरणात आतापर्यंत ६ टीम लीडर आणि एचआर (HR) एक्झिक्युटिव्ह निदा खानवर गंभीर आरोप करण्यात आले आहेत. कंपनीत काम करणाऱ्या कर्मचाऱ्यांवर दबाव आणून त्यांचं धर्मांतर करण्याचं कट कारस्थान रचल्याचं समोर आलं आहे.

आतापर्यंत १२ पीडितांची पुष्टी झाली असून विशेष तपास पथकाने (SIT) या प्रकरणात ९ एफआयआर (FIR) नोंदवले आहेत. कंपनीच्या ९ कर्मचाऱ्यांवर गंभीर गुन्हे दाखल करण्यात आले आहेत. या प्रकरणाच्या तपासात पोलिसांच्या हाती काही व्हॉट्सॲप चॅट्स लागले आहेत, ज्यातून असं स्पष्ट होतं की, कंपनीच्या नावाखाली काही कर्मचाऱ्यांची गँग स्वतःचा अजेंडा राबवत होती. सध्या पोलीस मुख्य आरोपी निदा खानचा शोध घेत आहेत.

जबरदस्तीने मांसाहार आणि नमाज पठण

ज्या ९ पीडितांनी तक्रारी केल्या आहेत, त्यांनी आपल्या एफआयआरमध्ये बलात्कार, लग्नाचं आमिष दाखवून लैंगिक छळ, हिंदू देवी-देवतांवर अश्लील टिप्पणी करणं, मांसाहार करण्यासाठी आणि नमाज पठणासाठी सक्ती करणं यांसारखे धक्कादायक आरोप केले आहेत. आरोपी टीम लीडर्स कर्मचाऱ्यांना इस्लामिक रितीरिवाज पाळण्यासाठी भाग पाडत होते.

निदा खानकडून ब्रेनवॉशिंग

या घटनेनंतर भाजपासह हिंदुत्ववादी संघटनांनी नाशिकमधील कंपनीच्या कार्यालयावर जोरदार निदर्शनं केली, तर विरोधकांनी याला तुष्टीकरणाचं राजकारण म्हटलं आहे. तपासादरम्यान व्हॉट्सॲप चॅटमध्ये इम्रान नावाच्या व्यक्तीचं नाव समोर आलं असून त्याचे संबंध मलेशियाशी असल्याचं सांगितलं जात आहे. इम्रान आपल्या भडकाऊ भाषणांच्या माध्यमातून कर्मचाऱ्यांवर इस्लाम स्वीकारण्यासाठी दबाव टाकत असल्याचा संशय आहे. या व्हॉट्सॲप ग्रुपमध्ये एचआर एक्झिक्युटिव्ह निदा खानचाही सहभाग होता.

डिलीट केलेले चॅट्स रिकव्हर करण्याचे प्रयत्न सुरू

तक्रार मिळाल्यानंतर पोलिसांनी चार महिला कॉन्स्टेबल्सना 'हाऊसकीपिंग स्टाफ' म्हणून कंपनीत तैनात केलं होतं, जेणेकरून तिथल्या हालचालींवर लक्ष ठेवता येईल. पोलिसांच्या म्हणण्यानुसार, निदा खान प्रत्यक्षरित्या कर्मचाऱ्यांचं ब्रेनवॉशिंग करत होती. या प्रकरणासाठी परदेशातून फंडिंग मिळत होतं का, याचाही तपास पोलीस करत आहेत. तसेच निदा खानने मुस्लीम कर्मचाऱ्यांच्या भरतीसाठी काही विशिष्ट 'पॅटर्न' वापरला होता का, याचीही चौकशी एसआयटी करत आहे.

TCS कंपनीची भूमिका

पोलिसांनी विचारलेल्या प्रश्नांना उत्तर देताना टीसीएसने एक निवेदन जारी केलं आहे. त्यात म्हटलं आहे की, "नाशिकमधील आमच्या कंपनीने या तक्रारी अत्यंत गांभीर्याने घेतल्या आहेत. आरोपी कर्मचाऱ्यांविरुद्ध कारवाई सुरू करण्यात आली असून, कंपनी तपासात पूर्ण सहकार्य करत आहे." नाशिक धर्मांतर प्रकरणात आतापर्यंत ६ कर्मचाऱ्यांना अटक करण्यात आली आहे. त्यांच्यावर तरुणींचं लैंगिक शोषण करणं आणि सक्तीने धर्मांतर करण्याचे आरोप आहेत.