नाशिक TCS प्रकरण: आरोपीचा काका म्हणतोय, 'पीडित तरुणी आणि आरोपीत प्रेमप्रकरण...'; न्यायालय आवारात गोंधळ

Nashik TCS Case: नाशिक TCS प्रकरण: आरोपींना पोलीस कोठडी, कोर्टाबाहेर नातेवाईकांचा गोंधळ; राजकीय षडयंत्राचा आरोप.

संपूर्ण राज्यभरात खळबळ उडवून देणाऱ्या नाशिकमधील टीसीएस कंपनीतील कथित लैंगिक अत्याचार आणि धर्मांतरण प्रकरणातील संशयित आरोपी शफी शेख आणि रझा मेमन यांना आज न्यायालयात हजर करण्यात आले. दोन्ही पक्षांचा युक्तिवाद ऐकून घेतल्यानंतर न्यायालयाने आरोपींना तीन दिवसांची पोलीस कोठडी सुनावली आहे. मात्र, या सुनावणीनंतर न्यायालय परिसरात आरोपींच्या नातेवाईकांनी मोठा गोंधळ घातल्याने तणाव निर्माण झाला होता.

न्यायालयाने कोठडी सुनावताच आरोपींचे नातेवाईक अय्याज काझी यांनी न्यायालय आवारात गोंधळ घातला. त्यांनी या प्रकरणाला राजकीय षडयंत्र असल्याचे म्हटले आहे.

टार्गेट करण्याचा प्रयत्न
मुस्लिम समाजाला मुद्दाम टार्गेट केले जात असून एका व्यक्तीच्या कृत्यामुळे संपूर्ण समाजाला दोषी धरणे चुकीचे आहे, असा दावा अय्याज काझी यांनी केला. पीडित तरुणी आणि आरोपी यांच्यात प्रेमसंबंध होते, असा दावा करत इतर सर्व गुन्हे खोटे असल्याचा आरोप नातेवाईकांनी केला आहे. 

राजकीय दबाव
या प्रकरणामागे मोठा राजकीय दबाव असून RSS आणि बजरंग दल यांसारख्या संघटनांचा यात हात असल्याचा खळबळजनक आरोप काझी यांनी प्रसारमाध्यमांशी बोलताना केला. जो गुन्हेगार असेल त्याला शिक्षा द्या, पण माझ्या पुतण्याला यात नाहक गोवण्यात येत आहे, असेही ते म्हणाले.

प्रशासनाने न्यायालय परिसरात चोख पोलीस बंदोबस्त तैनात केला होता.