Post Office मध्ये ३६ महिन्यांच्या एफडीमध्ये ₹२,००,००० जमा कराल तर किती मिळेल रिटर्न, पाहा कॅलक्युलेशन

Post Office Saving Schemes: पोस्ट ऑफिस केवळ टपाल सेवाच नाही, तर बँकिंग क्षेत्रातही अत्यंत विश्वासार्ह सेवा देत आहे. विशेष म्हणजे, पोस्ट ऑफिसच्या अनेक बचत योजना आज मोठ्या बँकांच्या योजनांपेक्षाही अधिक लोकप्रिय झाल्या आहेत.

याचं मुख्य कारण म्हणजे बँकांच्या तुलनेत पोस्ट ऑफिसमध्ये मिळणारा अधिकचा व्याजदर. पोस्ट ऑफिसमध्ये मुदत ठेवीला 'टीडी' (Time Deposit) म्हणून ओळखलं जातं, जी पूर्णपणे बँकांच्या एफडी (FD) सारखीच असते.

बँकांमध्ये ७ दिवसांपासून ते १० वर्षांपर्यंत एफडी करण्याचे अनेक पर्याय उपलब्ध असतात. मात्र, पोस्ट ऑफिसमध्ये गुंतवणुकीसाठी मर्यादित ४ पर्याय दिले जातात. तुम्ही १ वर्ष, २ वर्षे, ३ वर्षे आणि ५ वर्षांसाठी पैसे जमा करू शकता.

जरी पर्याय कमी असले, तरी व्याजाच्या बाबतीत पोस्ट ऑफिस बँकांच्या पुढे आहे. सध्या पोस्ट ऑफिस १ वर्षाच्या टीडीवर ६.९%, २ वर्षांवर ७%, ३ वर्षांवर ७.१% आणि ५ वर्षांच्या मुदत ठेवीवर ७.५% इतका आकर्षक व्याजदर देत आहे.

जर तुम्ही ३ वर्षांसाठी (३६ महिने) २ लाख रुपये पोस्ट ऑफिसमध्ये जमा केले, तर ७.१% व्याजदराप्रमाणे तुम्हाला मुदत संपल्यानंतर ४७,०१५ रुपये फक्त व्याजाचे मिळतील. म्हणजेच ३ वर्षांनंतर तुमच्या हातात एकूण २,४७,०१५ रुपये येतील.

बँकांमध्ये ज्येष्ठ नागरिकांसाठी व्याजाचे दर सामान्य ग्राहकांपेक्षा ०.५०% जास्त असतात आणि अति ज्येष्ठ नागरिकांसाठी (८० वर्षांवरील) तो दर अजून जास्त असतो.

परंतु, पोस्ट ऑफिसमध्ये सर्व वयोगटातील ग्राहकांसाठी टीडी किंवा एफडीवर समान व्याजदर लागू होतो. म्हणजेच तरुण असो वा ज्येष्ठ नागरिक, प्रत्येकाला व्याजाचा फायदा सारखाच मिळतो. थोडक्यात सांगायचे तर, सुरक्षित गुंतवणूक आणि निश्चित परतावा हवा असल्यास पोस्ट ऑफिसची ही टीडी योजना एक उत्तम पर्याय ठरू शकते.