हंटाव्हायरसच्या विळख्यात सापडलेले जहाज अखेर स्पेनमध्ये पोहोचले, युद्धपातळीवर मोहीम

Hantavirus Cruise Ship Update: जहाजावरील प्रवाशांना उतरवताना सर्वांना पांढरे मास्क दिले व नंतर त्यांना हजमत सूट घालण्यास दिला.

टेनेरीफ (स्पेन) : अर्जेंटिनामधून निघालेल्या आणि हंटाव्हायरसच्या विळख्यात सापडलेल्या 'एमएस होंडियस' या क्रूझ जहाजावरील प्रवाशांना रविवारी युद्धपातळीवर बाहेर काढण्यात आले. स्पेनच्या कॅनरी द्वीपसमूहातील टेनेरीफ बेटावर ही 'अभूतपूर्व' मोहीम राबविण्यात आली आहे.

जहाजावरील प्रवाशांना उतरवताना सर्वांना पांढरे मास्क दिले व नंतर त्यांना हजमत सूट घालण्यास दिला.

नंतर या प्रवाशांना विमानापर्यंत नेण्यापूर्वी विमानतळाच्या धावपट्टीवरच त्यांच्या अंगावर जंतुनाशकांची फवारणी करण्यात आली. प्रवाशांची त्यांच्या राष्ट्रीयत्वानुसार विभागणी करण्यात आली व त्यांना विशेष चार्टर विमानाने आपापल्या देशात पाठवले गेले.

स्थानिकांचा विरोध

जहाज बेटावर आणण्यावरून स्थानिक राजकारणही तापले होते. कॅनरी बेटांचे अध्यक्ष फर्नांडो क्लाविजो यांनी सुरुवातीला जहाजाला परवानगी नाकारली होती.

एखादा बाधित उंदीर रात्री जहाजावरून खाली उतरला तर संपूर्ण बेटाला धोका होईल, अशी भीती त्यांनी व्यक्त केली होती. मात्र, केंद्र सरकारने हस्तक्षेप करून ही मोहीम सुरक्षित असल्याचे स्पष्ट केले.