Nandurbar News | Latest Nandurbar News in Marathi | Nandurbar Local News Updates | ताज्या बातम्या नंदूरबार | नंदूरबार समाचार | Nandurbar Newspaper

उपविभागीय अधिकारी शाहूराज मोरे यांनी तळोदा तालुक्यातील राजविहीर येथे कोरोना लसीची पहिला मात्रा घेऊन नागरिकांना लसीकरणासाठी आवाहन केले. राजविहीर प्राथमिक आरोग्य केंद्रांतर्गत लसीकरणाचे प्रमाण कमी असल्याने मोरे यांनी प्राथमिक आरोग्य केंद्रात जाऊन लस घेण्याचा निर्णय घेतला. त्यांचे वाहनचालक सुनील पाटील यांनीदेखील त्याचठिकाणी नोंदणी करून लस घेतली. कोरोना लस पूर्णपणे सुरक्षित असून कोरोनामुळे होणारे गंभीर परिणाम टाळण्यासाठी लसीकरण आवश्यक आहे. नागरिकांनी अफवांवर विश्वास न ठेवता १८ वर्षांवरील सर्वांनी लसीकरण करून घ्यावे, असे आवाहन यावेळी मोरे यांनी केले. त्यांनी ‘माझे कुटुंब, माझी जबाबदारी’ मोहिमेअंतर्गत सर्वेक्षणाची माहितीदेखील घेतली. गावातील लोकप्रतिनिधी ग्रामस्थांना लसीकरणासाठी प्रोत्साहित करीत असल्याबद्दल त्यांनी समाधान व्यक्त केले. यावेळी तहसीलदार गिरीश वखारे, वैद्यकीय अधिकारी डाॅ. प्रशांत पवार, सरपंच लहू पाडवी, पंचायत समितीचे माजी सभापती आकाश वळवी, जिल्हा परिषद माजी सदस्य सतीश वळवी, आरोग्य सेविका चंद्रकला केंद्रे व जिरमा गावीत आदी उपस्थित होते.बिजादेवी येथे वृद्धांचे लसीकरणनवापूर तालुक्यातील बिजादेवी येथे ८० वर्षांचे वृद्ध वंतीबाई वळवी आणि जंगल्या वळवी यांनी कोरोना प्रतिबंधात्मक लस घेतली. लसीकरण केंद्रावर जाऊन त्यांनी लसीची पहिली मात्रा घेतली. त्यांचे उदाहरण इतरांसाठी प्रेरक असून नागरिकांनी कोरोनापासून बचाव करण्यासाठी लसीकरण करून घ्यावे, असे आवाहन तहसीलदार मंदार कुलकर्णी यांनी केले आहे.तलवाडे येथे लसीकरण शिबिराला प्रतिसादतालुका आरोग्य अधिकारी डॉ. जे. आर. तडवी यांच्या मार्गदर्शनाखाली नंदुरबार तालुक्यातील तलवाडे बुद्रुक येथे गुरुवारी आयोजित करण्यात आलेल्या कोरोना लसीकरण शिबिराला चांगला प्रतिसाद मिळाला. दुपारपर्यंत १४७ नागरिकांनी कोरोना प्रतिबंधात्मक लस घेतली. लसीकरणासाठी जिल्हा परिशछ शाळेच्या शिक्षकांनी पूर्वीच नागरिकांची नोंदणी केली होती. शिबिरासाठी ग्रामपंचायतीने सहकार्य केले. वैद्यकीय अधिकारी डॉ. मनोज गावीत, डॉ. चित्रांगिनी खैरनार, आरोग्य सेवक महेंद्र घुगे, अंकिता परदेशी यांच्यासह अन्य कर्मचाऱ्यांनी लसीकरणाचे काम पाहिले.नवापूर तालुक्यातील लसीकरण कार्यक्रमाला गती द्या - जिल्हाधिकारीनवापूर तालुक्यातील लसीकरण कार्यक्रमाला गती देण्यात यावी. फिरत्या पथकामार्फत गावपातळीवर ग्रामपंचायतीच्या सहकार्याने लसीकरण शिबिरांचे आयोजन करण्यात यावे, असे निर्देश जिल्हाधिकारी डॉ. राजेंद्र भारुड यांनी दिले. नवापूर येथे आयोजित आढावा बैठकीत ते बोलत होते. बैठकीस जिल्हा परिषदेचे मुख्य कार्यकारी अधिकारी रघुनाथ गावडे, जिल्हा शल्य चिकित्सक डॉ. रघुनाथ भोये, जिल्हा आरोग्य अधिकारी डॉ. नितीन बोडके, तहसीलदार मंदार कुलकर्णी, मुख्याधिकारी महेश चौधरी, तालुका वैद्यकीय अधिकारी डॉ. अविनाश मावची आदी उपस्थित होते. डॉ. भारुड म्हणाले, जनतेतील गैरसमज दूर करण्यासाठी विशेष प्रयत्न करावेत. शिक्षकांनी गावात जाऊन पात्र व्यक्तींची नोंदणी करावी आणि ग्रामस्थांच्या सहकार्याने गावात लसीकरण शिबिराचे आयोजन करण्यात यावे. गावात कोरोनाबाधित आढळल्यास त्यास त्वरित संस्थात्मक अलगीकरणात दाखल करावे, असे त्यांनी सांगितले. तत्पूर्वी जिल्हाधिकाऱ्यांनी ग्रामीण रुग्णालय विसरवाडी आणि खांडबारा येथील ग्रामीण रुग्णालयाला भेट देऊन तेथील व्यवस्थेची माहिती घेतली. त्यांनी नवापूर ट्रामा केअर सेंटर इमारत आणि उर्दू हायस्कूल येथील लसीकरण केंद्रालाही भेट दिली.

Nandurbar (Marathi News)