नागपूर भाजप शहराध्यक्ष तिवारींचा मोबाईल हॅक, आरोपींकडून लोकांना पैशांची मागणी

दयाशंकर तिवारी यांच्या मोबाईलवरून काही लोकांना सकाळच्या सुमारास व्हॉट्सअपवर, मी अडचणीत असून ५७ हजार रुपये तातडीने पाठवा, सायंकाळी पैसे परत करतो असे मॅसेजेस आले.

नागपूर : भाजपचे शहराध्यक्ष दयाशंकर तिवारी यांचा मोबाईल फोन अज्ञात गुन्हेगारांनी हॅक केला. तिवारी यांच्या सोशल माध्यमांवरील खात्यांवरून त्यांच्या कॉन्टॅक्ट लिस्ट व फ्रेंड लिस्टमधील लोकांना आरोपींकडून पैशांची मागणी करण्यात आली. त्यानंतर हा प्रकार समोर आला.

दयाशंकर तिवारी यांच्या मोबाईलवरून काही लोकांना सकाळच्या सुमारास व्हॉट्सअपवर, मी अडचणीत असून ५७ हजार रुपये तातडीने पाठवा, सायंकाळी पैसे परत करतो असे मॅसेजेस आले. लोकांनी तिवारी यांना दुसऱ्या क्रमांकावर फोन करून विचारणा केल्यावर फोन हॅक झाल्याची बाब स्पष्ट झाली. तिवारी यांनी यासंदर्भात तक्रार केली आहे. सोबतच सोशल माध्यमांवर त्यांनी याबाबत पोस्टदेखील केली. मी पैसे मागण्याबाबतचे कुठलेही मॅसेजेस किंवा फोन केलेला नाही. त्यामुळे अशा प्रकारचा मॅसेज आल्यावर त्याच्यावर विश्वास ठेवू नका व पैसे पाठवू नका असे आवाहन तिवारी यांनी केले आहे.