Satara Marathi News | सातारा मराठी बातम्या | Latest Satara News in Marathi | सातारा ताज्या बातम्या | Satara Crime Marathi News | सातारा ब्रेकिंग न्यूज़| Breaking & Live Satara News | Satara Local News Update| Today's Satara News paper

कऱ्हाड : शहरासह तालुक्याला बुधवारी रात्रीपासून धुवाधार पावसाने झोडपून काढण्यास सुरुवात केली आहे. रात्रभर जोरदार पाऊस पडल्यामुळे ओढे तुंबून गुरुवारी सकाळी महामार्गावर पाणी साचले. परिणामी, गोटे गावानजीक महामार्गावरील वाहतूक ठप्प झाली. शहरात काही दुकानांमध्ये पाणी शिरले. तर उंब्रजमध्ये विलगीकरण कक्षात पाणी गेल्यामुळे रुग्ण अडकून पडले.कऱ्हाडात काही दिवसांपूर्वी ढगफुटीसदृश्य पाऊस झाला होता. त्या वेळीही अनेक दुकानांमध्ये पाणी शिरल्यामुळे व्यापारी, विक्रेत्यांचे नुकसान झाले होते. त्यातून सावरत असतानाच बुधवारी रात्री पुन्हा पावसाने धुमाकूळ घातला. रात्री ८ वाजण्याच्या सुमारास पावसाला सुरुवात झाली. प्रारंभी पावसाचा जोर कमी होता. मात्र, रात्री १० वाजल्यानंतर पावसाचा जोर वाढला. तालुक्यात सर्वत्र जोरदार पाऊस झाला. त्यामुळे ओढ्यांसह दक्षिण मांड, वांग या उपनद्यांनाही पूरसदृश्य परिस्थिती निर्माण झाली. गोटे गावानजीक ओढ्याचे पाणी पुणे-बंगळूर राष्ट्रीय महामार्गावर शिरले. चार ते पाच फूट पाणी साचल्यामुळे वाहतूक ठप्प झाली. पोलिसांनी सुरक्षेच्या कारणास्तव हलकी वाहने रोखून धरली. तर अवजड वाहने या पाण्यातून वाट काढीत मार्गस्थ झाली. उत्तर मांड नदीकाठावरील शेतीसह घरे, वीटभट्टीमध्ये नदीचे पाणी शिरले. शिवडे येथे असलेल्या विलगीकरण कक्षाच्या आवारातही पाणी साठल्याने कक्षातील रुग्ण अडकून पडले.तालुक्यात सध्या खरीप हंगामाच्या तयारीला वेग आला आहे. काही शेतकऱ्यांनी पेरणीची कामेही हाती घेतली आहेत. मात्र, अतिवृष्टीमुळे या कामांचा खोळंबा झाला आहे. ठिकठिकाणी शेतांमध्ये मोठ्या प्रमाणावर पाणी साचले आहे. त्यामुळे शेतात पाण्याचे तळे झाले असून, पेरणी केलेल्या क्षेत्रातील बियाणे वाया जाण्याची भीती शेतकऱ्यांना आहे. तर पाणी साचलेल्या शेतात पाण्याचा निचरा होईपर्यंत पेरणी करता येणार नसल्याचीही परिस्थिती आहे. गुरुवारी सकाळी १० वाजल्यापासून पावसाचा जोर मंदावला. मात्र, सलग चौदा तास पडलेल्या जोरदार पावसामुळे जनजीवन विस्कळीत झाले आहे.- चौकट (१७केआरडी०६)महामार्गावरील पाण्यात कार बुडालीइचलकरंजी येथून शिरवळकडे कारमधून निघालेले प्रदीप जाधव हे गुरुवारी पहाटे साडेपाच वाजण्याच्या सुमारास गोटे गावच्या हद्दीत पोहोचले. त्या वेळी महामार्गावर पाणी साचले होते. पाण्याचा अंदाज न आल्यामुळे जाधव यांनी पाण्यातूनच कार पुढे नेण्याचा प्रयत्न केला. मात्र, ही कार पाण्याबरोबर वाहत गेली आणि उपमार्गानजीकच्या खोल डोहात अडकली. या वेळी प्रदीप जाधव कारमधून बाहेर पडल्यामुळे सुदैवाने बचावले.- चौकटप्रशासकीय इमारतीच्या तळमजल्यात पाणीशहरात मध्यवर्ती ठिकाणी नव्याने बांधण्यात आलेल्या प्रशासकीय इमारतीच्या तळमजल्यात पाणी शिरले आहे. गुरुवारी सकाळी तळमजल्यातील पार्किंगमध्ये पाण्याचा डोह कर्मचाऱ्यांना पाहायला मिळाला. या पाण्यात काही वाहनेही अडकून पडली. कर्मचाऱ्यांनी प्रयत्न करून तळमजल्यातील पाण्याचा निचरा करीत वाहने बाहेर काढली.- चौकट (फोटो : १७केआरडी०१)घरांमध्येही पाण्याचे तळेकऱ्हाडातील बनपूरकर कॉलनी मार्गावर पी. डी. पाटील उद्यानानजीक नाले तुंबल्यामुळे पावसाचे पाणी साचून काही घरांमध्ये शिरले. त्यामुळे संबंधित कुटुंबांचे संसारोपयोगी साहित्य भिजून नुकसान झाले. तसेच त्यांच्या निवाऱ्याचा प्रश्नही निर्माण झाला आहे.- चौकटतालुक्यात सरासरी ८८.०७ मिमी पाऊसकऱ्हाड तालुक्यात बुधवारी रात्री ८ वाजल्यापासून गुरुवारी सकाळी १० वाजेपर्यंत चौदा तासांत सरासरी ८८.०७ मिमी एवढ्या पावसाची नोंद झाली आहे. १ जूननंतर नोंदलेला हा सर्वाधिक पाऊस असून, या पावसाने सर्वत्र हाहाकार उडाला आहे.- चौकटसुपने, कोपर्डे मंडलात सर्वाधिकसुपने आणि कोपर्डे हवेली मंडलात सर्वाधिक पावसाची नोंद झाली आहे. सुपनेत ९९ तर कोपर्डे मंडलात ९८ मिलिमीटर एवढ्या पावसाची नोंद झाली आहे. जोरदार पावसाने या दोन्ही विभागांतील शेतांमध्ये मोठ्या प्रमाणावर पाणी साचले असून, काही घरांच्या भिंतींचीही पडझड झाली आहे.- चौकटविक्रमी नोंदतालुक्यातील सर्व मंडल विभागांत एकूण ११४५.०० मिलीमीटर एवढ्या विक्रमी पावसाची चौदा तासांत नोंद झाली आहे.- चौकटचौदा तासांत मंडलनिहाय पाऊसकऱ्हाड : ९५.००मलकापूर : ९३.००सैदापूर : ९०.००कोपर्डे ह : ९८.००मसूर : ७५.००उंब्रज : ८५.००शेणोली : ८८.००कवठे : ८२.००काले : ८०.००कोळे : ८७.००उंडाळे : ८५.००सुपने : ९९.००इंदोली : ८८.००(सर्व आकडेवारी मिलिमीटरमध्ये)

Satara (Marathi News)