पंजाबचे माजी DIG हरचरण सिंग भुल्लर यांच्या ११ ठिकाणांवर ED चा छापा; घरात सापडलेले ७.३६ कोटी

लाचखोरीच्या प्रकरणात अटक करण्यात आलेले पंजाबचे माजी डीआयजी (DIG) हरचरण सिंग भुल्लर यांच्या ११ ठिकाणांवर ईडीने छापा टाकला आहे. ही कारवाई सोमवारी सकाळी सुरू झाली. भुल्लर यांच्या चंदीगड, लुधियाना, पतियाळा, नाभा आणि जालंधर येथील ११ ठिकाणांची झडती घेतली जात आहे. ही ठिकाणं आरोपी भुल्लर आणि त्याच्या साथीदारांशी संबंधित आहेत. विशेष म्हणजे भुल्लर यांना गेल्या वर्षी ८ लाख रुपयांच्या लाच प्रकरणात अटक करण्यात आली होती, त्यानंतर केलेल्या छापेमारीत ७ कोटी रुपयांहून अधिक रोख रक्कम सापडली होती.

भुल्लर यांच्या ठिकाणांवर आज सुरू असलेली ईडीची कारवाई सीबीआय (CBI) आणि एसीबी (ACB) ने नोंदवलेल्या मूळ गुन्ह्यांशी संबंधित आहे. या गुन्ह्यांमध्ये मध्यस्थाच्या माध्यमातून एखादे गुन्हेगारी प्रकरण मिटवण्यासाठी लाच मागितल्याचा गंभीर आरोप आहे. तसेच उत्पन्नाच्या ज्ञात स्रोतांपेक्षा अधिक मालमत्ता असल्याचंही समोर आलं आहे.

मिळालेल्या माहितीनुसार, भुल्लर आणि त्यांच्या जवळच्या व्यक्तींच्या चंदीगडमधील दोन, लुधियानामधील ५, पतियाळा येथील दोन आणि नाभा व जालंधरमधील प्रत्येकी एका ठिकाणाची झडती घेतली जात आहे. गुन्ह्यातून कमावलेली अधिक मालमत्ता शोधणं, बेनामी मालमत्तांची ओळख पटवणं आणि मनी लाँड्रिंगशी संबंधित पुरावे गोळा करणं हा या शोधमोहिमेचा मुख्य उद्देश आहे.

गेल्या वर्षी चंदीगडमध्ये भुल्लर यांच्या निवासस्थानी घेतलेल्या झडतीदरम्यान सीबीआयने ७.३६ कोटी रुपयांहून अधिक रोख रक्कम, २.३२ कोटी रुपयांहून अधिक किमतीचे दागिने, २६ ब्रँडेड घड्याळं आणि कुटुंबातील सदस्यांच्या नावावर असलेल्या स्थावर मालमत्तेची कागदपत्रे जप्त केली होती. यानंतर आता पुन्हा एकदा ईडीने छापा टाकला आहे.