पाकिस्तान मध्यस्थ होण्याच्या लायक नाही! इराणने बुरखा फाडला; ट्रम्प म्हणाले, इराणच्या पाईपलाईन्स फुटणार... 

Iran-USA conflict 2026 update: इराण-अमेरिका युद्धादरम्यान पाकिस्तानची मध्यस्थी अयशस्वी ठरली आहे. पाकिस्तान अमेरिकेचा पक्ष घेतो, असा आरोप इराणने केला आहे. तर डोनाल्ड ट्रम्प यांनी इराणला ३ दिवसांच्या आत युद्धविराम न केल्यास तेल पाइपलाईन उद्धवस्त होण्याचा इशारा दिला आहे.

तेहरान/वॉशिंग्टन: मिडिल ईस्टमध्ये सुरू असलेल्या भीषण युद्धाला पूर्णविराम देण्यासाठी पाकिस्तान करत असलेल्या मध्यस्थीच्या प्रयत्नांना स्वतः इराणनेच सुरुंग लावला आहे. "पाकिस्तान हा आमचा मित्र नक्कीच आहे, पण तो या संघर्षात निष्पक्ष मध्यस्थी करण्याच्या लायक नाही," अशा स्पष्ट शब्दांत इराणच्या संसदेने पाकिस्तानची भूमिका फेटाळून लावली आहे.

इराणी संसदेच्या राष्ट्रीय सुरक्षा समितीचे प्रवक्ते इब्राहिम रेजई यांनी पाकिस्तानच्या मध्यस्थीवर गंभीर प्रश्न उपस्थित केले आहेत. रेजई म्हणाले की, "पाकिस्तान अनेकदा अमेरिकेच्या आणि विशेषतः डोनाल्ड ट्रम्प यांच्या हितांना प्राधान्य देतो. त्यांच्या विरोधात काहीही बोलण्याचे धाडस पाकिस्तान करत नाही. एक योग्य मध्यस्थ तोच असतो जो दोन्ही बाजूंकडे निष्पक्षपणे पाहतो, पण पाकिस्तानचा कल नेहमीच एका बाजूला झुकलेला असतो."

अमेरिकेच्या अवास्तव मागण्यांमुळे चर्चा फिसकटली?
इराणचे परराष्ट्र मंत्री अब्बास अराघची यांनी रशियामध्ये पोहोचल्यानंतर स्थानिक पत्रकारांशी बोलताना पाकिस्तानमधील चर्चेच्या अपयशाचे खापर अमेरिकेवर फोडले. "अमेरिकेच्या अवास्तव आणि अवाजवी मागण्यांमुळे इस्लामाबादमधील शांतता चर्चा यशस्वी होऊ शकली नाही," असा आरोप अराघची यांनी केला. तसेच, होर्मुझच्या सामुद्रधुनीतील सुरक्षा हा केवळ इराणचा नाही, तर जगाचा मुद्दा असल्याचेही त्यांनी स्पष्ट केले.

ट्रम्प यांचा 'पाइपलाईन' ब्लास्टचा इशारा
दुसरीकडे, अमेरिकेचे राष्ट्राध्यक्ष डोनाल्ड ट्रम्प यांनी इराणला शेवटचा इशारा दिला आहे. "इराणकडे युद्धविरामावर स्वाक्षरी करण्यासाठी केवळ तीन दिवस उरले आहेत, अन्यथा त्यांच्या तेल पाइपलाईन्समध्ये स्फोट होईल," अशी धमकी ट्रम्प यांनी फॉक्स न्यूजला दिलेल्या मुलाखतीत दिली. नाकेबंदीमुळे तेलाचा उपसा थांबला असून पाइपलाईनमधील वाढत्या दाबाने त्या तांत्रिक कारणांमुळे स्वतःहून फुटू शकतात आणि त्यांची दुरुस्ती अशक्य होईल, असा दावा ट्रम्प यांनी केला आहे.