बारामती : बारामती-भिगवण रोडवरील वंजारवाडीजवळील सोमनाथ हॉटेलमधील अमृता लॉजवर सुरू असलेल्या अवैध वेश्या व्यवसायावर बारामती तालुका पोलिसांनी मध्यरात्री छापा टाकला. या कारवाईत दोन आरोपींना अटक करण्यात आली असून, पाच महिलांची सुटका करण्यात आली आहे. मंगळवारी (दि. १४) पहाटे ३ वाजण्याच्या सुमारास पोलिसांना मिळालेल्या खात्रीशीर माहितीच्या आधारे ही कारवाई करण्यात आली.
पोलिस सूत्रांनी दिलेल्या माहितीनुसार, पोलिस निरीक्षक चंद्रशेखर यादव आणि उपनिरीक्षक रामहरी भोसले यांच्या पथकाने बोगस ग्राहकाच्या मदतीने सापळा रचला. पंचांना सोबत घेऊन नियोजनपूर्वक अमृता लॉजवर धाड टाकण्यात आली. छापेमारीदरम्यान लॉजमधील विविध खोल्यांची तपासणी करण्यात आली असता काही ठिकाणी महिला आणि ग्राहक एकत्र आढळले. चौकशीदरम्यान, संबंधित आरोपी बाहेरून महिलांना आणून त्यांना ग्राहकांना पुरवत असल्याचे उघड झाले. ग्राहकांकडून पैसे वसूल करून त्यातून स्वतःचा आर्थिक फायदा मिळविण्यात आल्याचेही उघड झाले.
या प्रकरणात अजित जयसीन शेट्टी (वय ३८, हॉटेल चालक) आणि चाँद कलाम आलम (वय २०) यांना अटक करण्यात आली आहे. या घटनेत सापडलेल्या पश्चिम बंगाल येथील ३ व भिवंडी मुंबई येथील २ अशा ५ महिलांची सुटका करण्यात आली असून, त्यांना सुधारगृहात ठेवण्यात आले आहे. दोन्ही आरोपींनी संगनमत करून महिलांना पैशांचे आमिष दाखवून देहव्यवसाय चालविल्याचे निष्पन्न झाले आहे. कारवाईदरम्यान पोलिसांनी बोगस ग्राहकाला दिलेल्या नोटांसह रोख रक्कम, मोबाइल फोन, कंडोम पाकिटे तसेच ग्राहकांची नोंद असलेले रजिस्टर असा सुमारे १७,८०० रुपयांचा मुद्देमाल जप्त केला. या प्रकरणी बारामती तालुका पोलिस ठाण्यात गुन्हा दाखल करण्यात आला आहे.
Web Summary : Baramati police raided Amruta Lodge, uncovering an illegal sex racket. Two arrested, five women rescued from West Bengal and Mumbai. Cash, phones seized.
Web Summary : बारामती पुलिस ने अमृता लॉज पर छापा मारा, अवैध सेक्स रैकेट का पर्दाफाश किया। दो गिरफ्तार, पश्चिम बंगाल और मुंबई से पांच महिलाओं को बचाया गया। नकदी, फोन जब्त।