‘कासवबाबा’चे इंदापुरातही जाळे ? राजकीय इच्छुकांसह अनेकांनी घेतली कृपादृष्टीची धाव 

- टेंभुर्णी पोलिसांनी नुकतेच या बाबासह त्याच्या भावाविरुद्ध गुन्हा दाखल करून दोघांना अटक केली आहे.

इंदापूर : कासवाच्या माध्यमातून लोकांना गंडा घालणाऱ्या आढेगावच्या तथाकथित ‘कासवबाबा’चे इंदापूर तालुक्यातही भक्कम नेटवर्क असल्याची धक्कादायक माहिती समोर येत आहे. सर्वसामान्य नागरिकांबरोबरच निवडणुकांच्या काळात अनेक इच्छुक उमेदवारांनीही या बाबाची कृपादृष्टी मिळावी म्हणून त्याच्या आश्रमाची पायधूळ झाडल्याची चर्चा रंगली आहे. काहींनी मोठ्या रकमा मोजून जिवंत तसेच कृत्रिम कासवे घेतल्याची माहितीही समोर येत आहे.

इंदापूर शहराच्या पूर्वेला पुणे-सोलापूर राष्ट्रीय महामार्गालगत असलेल्या तरटगाव परिसरातून भीमानगरमार्गे अवघ्या काही किलोमीटर अंतरावर आढेगाव येथे नानासाहेब वीरकर ऊर्फ ‘कासवबाबा’चा वातानुकूलित आश्रम आहे. पैशांचा पाऊस पाडणारे आणि संकटापासून संरक्षण देणारे कासव विकत देण्याच्या नावाखाली या भोंदूबाबाने सर्वसामान्य, सुशिक्षित तसेच राजकीय क्षेत्रातील लोकांना जाळ्यात ओढून लाखो रुपये उकळल्याचा आरोप आहे.

टेंभुर्णी पोलिसांनी नुकतेच या बाबासह त्याच्या भावाविरुद्ध गुन्हा दाखल करून दोघांना अटक केली आहे. त्यानंतर विविध भागांतून तक्रारी समोर येऊ लागल्या असून, या प्रकरणाची व्याप्ती वाढत असल्याचे दिसून येत आहे. दरम्यान, इंदापूर तालुक्यातील कांदलगाव, तरटगाव, निरा-नृसिंहपूर, निमगाव केतकी, वालचंदनगर, जंक्शन, लासुर्णे या भागांत या बाबाचे एजंट आणि भक्तांचे जाळे कार्यरत असल्याची चर्चा आहे. विशेष म्हणजे जिल्हा परिषद, पंचायत समिती आणि नगरपरिषद निवडणुकांच्या काळात अनेक इच्छुक उमेदवारांनी या आश्रमाला भेटी दिल्याचे बोलले जात आहे.

राजकीय क्षेत्रातील काही व्यक्ती, पोलिस अधिकारी, महाराष्ट्र केसरी दर्जाचे कुस्तीगीर तसेच युवकांमध्ये प्रभाव असलेल्या काही व्यक्तींसमवेत ‘कासवबाबा’ची छायाचित्रे सोशल मीडियावर व्हायरल होत असल्याने या प्रकरणाची चर्चा अधिकच रंगली आहे. पोलिसांनी तपासाची दिशा इंदापूरकडे वळवल्यास या संपूर्ण जाळ्याचा पर्दाफाश होण्याची शक्यता व्यक्त केली जात असून, त्यामुळे अनेकांचे धाबे दणाणल्याचे बोलले जात आहे.