कारचा कट बसला; दुचाकीस्वार थेट रस्त्यावर पडला, डोक्यावरून ट्रकचे चाक गेल्याने मृत्यू

दुचाकीस्वार तरुणाच्या मागे बसलेल्या मैत्रिणीच्या पायावरून ट्रकचे चाक गेल्याने गंभीर दुखापत होऊन फ्रॅक्चर झाले आहे

मंचर : दुचाकीला वाहनाची कट लागल्यानंतर रस्त्यावर पडलेल्या तरुणाच्या डोक्यावरून ट्रकचे चाक गेल्याने तो जागीच ठार झाला तर त्याची मैत्रीण गंभीर जखमी झाली आहे. ऋषिकेश गोरख सुर्वे (वय. २७ रा. वाघोली मूळ रा. वानेवाडी ता. तुळजापूर) असे अपघातात ठार झालेल्या तरुणाचे नाव असून हा अपघातमंचर गावच्या हद्दीत पिंपळगाव चौकाजवळ मंगळवारी सायंकाळी घडला.

मंचर पोलिसांनी दिलेल्या माहितीनुसार, ऋषिकेश गोरख सुर्वे हा त्याच्या ताब्यातील मोटारसायकलवरून मैत्रिणीसोबत मंचर बाजूकडून नारायणगाव बाजूकडे चालला होता. त्यावेळी नारायणगाव बाजूकडे चाललेल्या कारने उजव्या बाजूने ओव्हरटेक करताना मोटारसायकलचा हँडल कारच्या पाठीमागील बाजूस लागला. त्यानंतर दुचाकीवरील ऋषिकेश हा रस्त्यावर पडला. समोरून नारायणगाव बाजूकडून ट्रक वेगाने आला. सदर ट्रकचे चाक ऋषिकेशच्या डोक्यावरून गेल्याने त्याचा जागीच मृत्यू झाला. तर मागे बसलेल्या मैत्रिणीच्या पायावरून ट्रकचे चाक गेल्याने गंभीर दुखापत होऊन फ्रॅक्चर झाले. मैत्रिणीचे नाव समजू शकले नाही. याप्रकरणी तेजस गोरख सुर्वे यांनी मंचर पोलिस ठाण्यात फिर्याद दिल्यानंतर ट्रकचालक गुलाम अब्बास सय्यद (रा. मंचर) याच्या विरोधात गुन्हा दाखल झाला आहे. पुढील तपास मंचर पोलिस करीत आहेत.