पुणे: पोलिस भरती दरम्यान मैदानी चाचणीत धावताना एका २३ वर्षीय तरुणाचा मृत्यू झाल्याची घटना शिवाजीनगर पोलिस मुख्यालयातील मैदानावर शनिवारी (दि. २८) सकाळी घडली. १६०० मीटर धावण्याची चाचणी देत असताना अचानक त्याला ‘फिट’ आली. मैदानात बेशुद्ध होऊन कोसळल्यानंतर त्याला तातडीने रुग्णालयात दाखल करण्यात आले. उपचारापूर्वीच त्याचा मृत्यू झाल्याचे वैद्यकीय तज्ज्ञांनी सांगितले.
पुरुषोत्तम बारकुल (वय २३, रा. देऊळगाव राजा, जि. बुलढाणा) असे मृत्युमुखी पडलेल्या तरुणाचे नाव आहे. पुणे शहर दलातील भरती प्रक्रिया गेल्या महिन्याभरापासून सुरू आहे. शिवाजीनगर येथील पोलिस मुख्यालयातील मैदानावर मैदानी चाचणी घेण्यात येत आहे. शनिवारी सकाळी मैदानी चाचणी सुरू झाली. पुरुषोत्तम बारकुल हा मैदानी चाचणीत सहभागी झाला. भरती प्रक्रियेतील १६०० मीटर धावण्याची चाचणी ही कठीण मानली जाते. पुरुषोत्तम याने मैदानाला दोन फेऱ्या मारल्या, तिसऱ्या फेरीत अचानक त्याला फिट आली. तो धावताना मैदानावरच कोसळला. त्याच्याबरोबर असलेल्या उमेदावारांसह, भरती प्रक्रियेतीली अधिकारी आणि कर्मचाऱ्यांच्या लक्षात हा प्रकार आला. मैदानावर उपस्थित असलेल्या वैद्यकीय पथकाने त्याची प्राथमिक तपासणी केली. त्याच्या हृदयाचे ठोके मंद झाल्याचे निदर्शनास आले. त्याला तातडीने ससून रुग्णालयात दाखल करण्यात आले. उपचारापूर्वीच तो मरण पावल्याचे ससूनमधील वैद्यकीय तज्ज्ञांनी सांगितले.
पुरुषोतत्म बारकुल याने भरती प्रक्रियेसाठी चांगली तयारी केली होती. मूळचा बुलढाणा जिल्ह्यातील देऊळगाव राजाचा रहिवासी असलेल्या पुरुषोत्तम याचा भरती प्रक्रियेत धावताना मृत्यू झाल्यानंतर हळहळ व्यक्त करण्यात आली. याबाबतची माहिती त्याच्या कुटुंबीयांना पोलिस अधिकाऱ्यांनी दिल्यानंतर शोकाकुल कुटुंबिय पुण्याकडे रवाना झाले.
Web Summary : A 23-year-old man died during a police recruitment run in Pune after collapsing on the field. He suffered a fit during the 1600-meter race and was rushed to the hospital, where he was declared dead before treatment. He hailed from Buldhana district.
Web Summary : पुणे में पुलिस भर्ती दौड़ के दौरान मैदान पर गिरने से 23 वर्षीय युवक की मौत हो गई। 1600 मीटर दौड़ के दौरान उसे दौरा पड़ा और अस्पताल ले जाने पर उसे मृत घोषित कर दिया गया। वह बुलढाणा जिले का रहने वाला था।