मध्यपूर्वेत काही तरी मोठं घडणार? 'या' देशानं सौदी अरेबियामध्ये तैनात केले तब्बल ८००० सैनिक अन् लढाऊ विमानं

संबंधित सूत्रांनी याला 'महत्त्वपूर्ण युद्ध-सक्षम फौज' असे नाव दिले आहे. सौदी अरेबियावर मोठा हल्ला झाल्यास लष्कराला मजबूत पाठबळ देणे, हा या तैनातीचा उद्देश आहे....

अमेरिका-इस्रायल आणि इराण युद्धामुळे संपूर्ण मध्यपूर्वेतच प्रचंड तणावाची स्थिती निर्माण झाली आहे. या वाढत्या तणावाच्या पार्श्वभूमीवर, पाकिस्तानने परस्पर संरक्षण करारांतर्गत सौदी अरबमध्ये तब्बल ८००० सैनिक, एक संपूर्ण लढाऊ विमान स्क्वॉड्रन आणि अत्याधुनिक हवाई संरक्षण यंत्रणाही तैनात केली आहे. 'रॉयटर्स'च्या वृत्तानुसार, तीन सुरक्षा अधिकारी आणि दोन सरकारी सूत्रांनीही याची पुष्टी केली आहे. 

संबंधित सूत्रांनी याला 'महत्त्वपूर्ण युद्ध-सक्षम फौज' असे नाव दिले आहे. सौदी अरेबियावर मोठा हल्ला झाल्यास लष्कराला मजबूत पाठबळ देणे, हा या तैनातीचा उद्देश आहे. मात्र, पाकिस्तानचे लष्कर, परराष्ट्र मंत्रालय अथवा सौदी अरेबियाच्या सरकारी मीडिया कार्यालयाकडून यासंदर्भात अद्याप कोणतेही अधिकृत भाष्य करण्यात आलेले नाही.

लढाऊ विमानं अन् हवाई संरक्षण यंत्रणा तैनात -
माध्यमांनी सुत्रांच्या हवाल्याने दिलेल्या माहितीनुसार, पाकिस्तानने जवळपास १६ विमानांचे संपूर्ण स्क्वॉड्रन सौदीमध्ये तैनात केले आहे. यात प्रामुख्याने चीनच्या सहकार्याने विकसित केलेली 'JF-17 थंडर' लढाऊ विमाने, जी एप्रिलच्या सुरुवातीलाच तेथे पोहोचली आहेत. दोन ड्रोन स्क्वॉड्रन, चिनी बनावटीची 'HQ-9' हवाई संरक्षण यंत्रणेचाही समावेश आहे. याचे संचालन पाकिस्तानी कर्मचारी करत आहेत तर खर्च सौदी अरेबिया कर आहे.

सुरक्षा अधिकाऱ्यांनी दिलेल्या माहितीनुसार, इराणशी संबंधित संभाव्य संघर्षाच्या स्थितीत, या पाकिस्तानी कर्मचाऱ्यांची मुख्य भूमिका सल्लागार आणि प्रशिक्षकाची असेल. या नवीन तुकडीमुळे सौदीतील पाकिस्तानी सैनिकांची संख्या आणखी वाढली आहे. एका गोपनीय करारानुसार, सौदी अरबमध्ये ८०००० पर्यंत पाकिस्तानी सैनिक आणि युद्धनौकांच्या तैनातीचाही उल्लेख आहे, मात्र युद्धनौका पोहोचली आहेत की नाही, अद्याप स्पष्ट नाही.