Crime News : तीन वर्षांचा गैरप्रकार उघड ...! ७७ वर्षीय ज्येष्ठांचा पाणीचोरीविरोधात लढा; व्यावसायिकाला लाखाचा दंड

तीन वर्षांचा गैरप्रकार उघड : दत्ता धामस्कर यांच्या पाठपुराव्यामुळे महापालिकेला करावी लागली कारवाई 

प्राधिकरण : प्राधिकरण परिसरात सुरू असलेल्या पाणीचोरीच्या प्रकारावर ७७ वर्षीय ज्येष्ठ नागरिकाने थेट लढा उभारत महापालिका प्रशासनाला कारवाईस भाग पाडले. तब्बल तीन वर्षे सुरू असलेल्या या गैरप्रकाराचा भांडाफोड करत संबंधित व्यावसायिकावर १ लाख ३०० रुपयांचा दंड ठोठावण्यात आला.

प्राधिकरण येथील ज्येष्ठ नागरिक दत्ता धामस्कर यांनी निवासी पाणी जोडणीतून सलून व्यवसायासाठी पाण्याचा बेकायदा वापर सुरू असल्याचे उघड केले. हा प्रकार त्यांनी वारंवार ‘अ’ प्रभागाच्या क्षेत्रीय अधिकाऱ्यांच्या निदर्शनास आणून दिला; मात्र सुरुवातीला प्रशासनाकडून त्याकडे दुर्लक्ष झाल्याचे समोर आले.

प्रशासनाच्या उदासीनतेला न जुमानता धामस्कर यांनी माहिती अधिकाराचा वापर करत सातत्याने पाठपुरावा सुरू ठेवला. अखेर महापालिकेला तपास करावा लागला. या तपासात मागील तीन वर्षांपासून पाणीचोरी सुरू असल्याचे स्पष्ट झाले. त्यानुसार संबंधित व्यावसायिकावर १ लाख ३०० रुपयांचा दंड ठोठावण्यात आला. या कारवाईमुळे महापालिकेच्या उत्पन्नाला बसणारा मोठा फटका थांबवण्यात प्रशासनाला यश आले. 

पोलिस संरक्षणामुळे लढा कायम

दत्ता धामस्कर यांच्या या सातत्यपूर्ण लढ्याचे स्थानिक नागरिकांसह महापौर रवी लांडगे यांनीही कौतुक केले. तक्रार प्रक्रियेदरम्यान त्यांना आणि त्यांच्या कुटुंबीयांना त्रास सहन करावा लागला; मात्र पोलिस संरक्षणामुळे त्यांनी हा लढा कायम ठेवला, असे नागरिकांकडून सांगण्यात आले.