Ajit Pawar Passes Away: महाराष्ट्राच्या राजकारणात अजित पवार कसे बनले 'दादा'; शरद पवारांकडून घेतलेत राजकारणाचे धडे

Ajit Pawar News: महाराष्ट्राच्या राजकारणात संघर्ष आणि परिस्थितीशी दोन हात करत ज्या नेत्यानं आपली स्वतंत्र ओळख निर्माण केली, ते नाव म्हणजे अजित अनंतराव पवार. राज्याच्या राजकारणात आज त्यांना 'दादा' या नावानं ओळखलं जातं. मात्र, या शिखरापर्यंत पोहोचण्याचा त्यांचा प्रवास सोपा नव्हता. आपल्या राजकीय गुरूंनी आणि काका शरद पवार यांच्या मार्गदर्शनाखाली राजकारणाचे धडे गिरवून, नंतर त्यांनी स्वतःची स्वतंत्र वाट निर्माण केली.

अजित पवार यांना राजकारण घरातूनच मिळाले. त्यांनी शरद पवार यांच्याकडून सर्वकाही शिकले. महाराष्ट्रातील राजकारणाची रणनीती असो किंवा जनसंपर्क वाढवण्याची कला, अजित पवारांनी आपल्या काकांसोबत राहून प्रत्येक पैलू जवळून समजून घेतला.

प्रदीर्घ काळ ही जोडी राष्ट्रवादी काँग्रेसची (एनसीपी) धुरा सांभाळत राहिली. शरद पवार हे पक्षाचा चेहरा आणि दिशा असतील, तर अजित पवार हे पक्षाची ऊर्जा आणि कार्यक्षमता आहेत, अशी कार्यकर्त्यांची धारणा होती.

गेल्या दोन दशकांत जेव्हा जेव्हा राष्ट्रवादी काँग्रेसचा उल्लेख झाला, तेव्हा अजित पवार हे नाव अग्रक्रमानं समोर आलं. विकास, प्रशासनावरील पकड आणि जलद निर्णय घेण्याची क्षमता या गुणांमुळे ते राज्यातील एक प्रभावी नेते बनले. सत्तेत असो वा विरोधात, अजित पवार नेहमीच राजकारणाच्या केंद्रस्थानी राहिले.

काळानुसार शरद पवार आणि अजित पवार यांच्या विचारसरणीत फरक पडू लागला, विशेषतः एनडीए (NDA) सोबतच्या आघाडीवरून त्यांच्यातील मतभेद समोर आले. शरद पवार पारंपरिक 'धर्मनिरपेक्ष' राजकारणाच्या मार्गावर ठाम राहिले, तर अजित पवार हे व्यावहारिक सत्ता-सहभागाच्या राजकारणाचे समर्थक दिसू लागले. या मतभेदांमुळेच पक्षात मोठी दरी निर्माण झाली. अखेर, अजित पवारांनी आपल्या काकांपासून वेगळी वाट धरली. सुरुवातीला हे पाऊल राजकीयदृष्ट्या जोखमीचं मानलं गेलं, पण त्यांनी याचं संधीत रूपांतर केलं.

राजकारणात जनशक्ती हीच नेत्याची खरी ताकद असते. जेव्हा राष्ट्रवादी काँग्रेसमध्ये शक्तिप्रदर्शन झालं, तेव्हा बहुतांश आमदार अजित पवारांच्या बाजूने उभे राहिले. या क्षणानं हे सिद्ध केले की पक्षावर खरी पकड आता त्यांचीच आहे. महाराष्ट्र विधानसभा निवडणुकीतही त्यांची रणनीती यशस्वी ठरली. निवडणुकांत अजित पवारांनी चांगली कामगिरी करत अधिक जागा जिंकल्या. राजकीय विश्लेषकांच्या मते, या कामगिरीनं हे स्पष्ट केले की आता तेच खऱ्या अर्थानं 'दादा' आहेत आणि पक्षाची सूत्रे त्यांच्या हातात आहेत.

वेगळे झाल्यानंतरही अजित पवारांनी आपल्या राजकारणाला केवळ 'बंडखोरी'ची कहाणी बनू दिलं नाही. राज्याची स्थिरता आणि विकास हेच आपले उद्दिष्ट असल्याचा दावा त्यांनी केला. काळानुसार त्यांनी स्वतःला एक 'व्यावहारिक नेता' म्हणून प्रस्थापित केलं. जिथे भावनांपेक्षा काम, योजना आणि राजकीय समीकरणांना अधिक महत्त्व दिले जातं.