हिंगोली : रेशनचे ७८ क्विंटल धान्य काळ्या बाजारात विक्रीसाठी नेणारी दोन वाहने स्थानिक गुन्हे शाखेच्या पथकाने पकडली. ही कारवाई ७ जुलै रोजी रात्री दहा वाजेच्या सुमारास हिंगोली शहरातील शिवाजी चौक परिसरात करण्यात आली. याप्रकरणी हिंगोली शहर पोलीस ठाण्यात दोन पिकअप चालकांविरूद्ध गुन्हा नोंद झाला आहे.
हिंगोली शहरातून दोन वाहनाद्वारे रेशनचे धान्य काळ्या बाजारात नेले जाणार असल्याची माहिती स्थानिक गुन्हे शाखेच्या पथकाला मिळाली होती. त्यानुसार पोलीस अधीक्षक राकेश कलासागर, अप्पर पोलीस अधीक्षक यशवंत काळे, सहाय्यक पोलीस अधीक्षक यतीश देशमुख यांच्या मार्गदर्शनाखाली स्थागुशाचे पोलीस निरीक्षक उदय खंडेराय, पोलीस उप निरीक्षक किशोर पोटे, शिवसांब घेवारे, सहाय्यक पोलीस उप निरीक्षक बालाजी बोके, पोह. संभाजी लेकूळे, राजू ठाकूर, भगवान शिंगाडे, शंकर ठोंबरे, किशोर सावंत, ज्ञानेश्वर पायघन, आकाश टापरे, शेख जावेद यांच्या पथकाने ७ जुलै रोजी रात्री दहा वाजेच्या सुमारास शहरातील छत्रपती शिवाजी महाराज पुतळा परिसरात सापळा लावला.
यावेळी एमएच ४० सीडी ११७४ व एमएच ३७ टी १६६४ क्रमांकाचे पिक अप वाहने थांबवून तपासणी केली असता या वाहनात रेशनचे धान्य असल्याचे आढळले. एमएच ४० सीडी ११७४ या वाहनात ७० थैलीमध्ये ६९ हजार रूपयांचा ३४.५ क्विंटल रेशनवर दिला जाणारा तांदूळ व ११ थैलीमध्ये ११ हजार रूपये किमतीचे ५.५ क्विंटल गहू असा एकूण ४० क्विंटल धान्य साठा आढळून आला. तर एमएच ३७ टी १६६४ या वाहनात ७७ थैलीमध्ये ७६ हजार रूपये किमतीचे ३८ क्विंटल गहू आढळला. पोलिसांनी दोन्ही वाहने रेशनच्या धान्यासह ताब्यात घेतले असून याप्रकरणी हिंगोली शहर पोलीस ठाण्यात पोलीस उप निरीक्षक किशोर पोटे यांच्या फिर्यादीवरून चालक अरबाज असिफ खान (रा. पलटन, हिंगोली), कैलास प्रेमानंद पेषकलवाड (रा. उफळी पेन ता. वाशीम) यांच्याविरूद्ध गुन्हा नोंद झाला आहे.
मध्यप्रदेश स्टेट सिव्हिल सप्लाय नावाची पाेतेपोलिसांनी पकडलेल्या एका वाहनातील रेशनच्या धान्यासाठी वापरलेल्या थैल्यावर मध्यप्रदेश स्टेट सिव्हिल सप्लाय प्रा. लि. असे छापलेले आहे. रेशनचे धान्य कोठून आणले, कोणत्या दुकानाचे होते, कोठे नेले जाणार होते, याचा तपास पोलीस करीत आहेत.