Sangli: बुटात लपवलेली चावी, फ्लॅट उघडून चोरट्याने मारला ५ लाखांच्या दागिन्यांवर डल्ला

पाळत ठेऊन चोरी

सांगली : फ्लॅट बाहेर ठेवलेल्या बुटात लपवलेली चावी घेऊन चोरट्याने आरामात फ्लॅट उघडून आतमध्ये प्रवेश केला. त्यानंतर कपाट व लॉकर फोडून दागिन्यांसह रोख रक्कम असे एकूण ५ लाख ४४ हजारांची चोरी केली. ही घटना गावभागातील संग्राम चौक जवळील जय अपार्टमेंटच्या फ्लॅट नं १३ मध्ये सोमवारी दुपारी घडली. याबाबत किरण केसरे यांनी फिर्याद दिली आहे.

पोलिसांकडून मिळालेल्या माहितीनुसार, सांगलीच्या गाव भागातील संग्राम चौक जवळील जय अपार्टमेंटमध्ये १३ क्रमांकाचा फ्लॅट किरण गजानन केसरे (वय ५०, व्यवसाय खासगी नोकरी) यांचा आहे. ते सोमवारी सकाळी फ्लॅटला कुलूप घालून बाहेर गेले होते. यावेळी फ्लॅटच्या बाहेर असलेल्या बुटात फ्लॅटची चावी होती. ती चावी घेऊन अज्ञात चोरट्याने फ्लॅटचा दरवाजा उघडून आत प्रवेश केला. तसेच हॉलमधील तिजोरीचे दरवाजे व लॉकर त्याने फोडले.

त्यामध्ये असलेले सोन्याचे कानातील टॉप्स, नेकलेस, मणी, टिक्की, जेंट्स व लेडीज अंगठी, दोन लहान अंगठी, कानातील रिंग, वेढणी, कानातील झुबे, दोन बोरमाळ असे एकूण साडेसात तोळ्याहून अधिकचे सोन्याचे दागिने, १० ग्रॅम वजनाचे चांदीचे जास्वंदी फूल आणि रोख २५ हजार रक्कम असा एकूण ५ लाख ४४ हजारांचा मुद्देमाल चोरट्याने लंपास केला. सदरची घटना सोमवारी सकाळी ११ ते दुपारी अडीचच्या दरम्यान घडली. दुपारनंतर किरण हे घरी आल्यावर फ्लॅटमध्ये चोरी झाल्याचे त्यांना समजले.

याबाबत केसरे यांनी सांगली शहर पोलिस ठाण्यात अज्ञात चोरट्याविरोधात फिर्याद दिली आहे. त्यानुसार गुन्हा नोंद करण्यात आला आहे. घटनास्थळी पंचनामा करुन डॉग स्कॉड, फिंगरप्रिंट पथक यांनी तपासणी केली. तसेच उपविभागीय पोलिस अधिकारी प्रणील गिल्डा यांनी घटनास्थळी भेट देऊन पाहणी केली.

पाळत ठेऊन चोरी

फ्लॅटच्या बाहेर ठेवलेल्या बुटात फ्लॅटची चावी होती. ती चावी घेऊन चोरट्याने फ्लॅटमध्ये प्रवेश केला होता. बुटातील चावी संदर्भात कुटुंबीयांच्या जवळच्या व्यक्तींना माहिती असणार किंवा पाळत ठेऊन फ्लॅटची चावी कोठे असते हे माहिती करुन घेऊन चोरट्याने चोरी केली आहे. या दिशेने पोलिसांचा तपास सुरु आहे.