पुणे अपघात: आमदाराने पोलिसांवर दबाव आणल्याचा आरोप, ३ दिवसांनंतर अजित पवार ॲक्शन मोडवर!

अपघात प्रकरणात वडगावशेरी येथील राष्ट्रवादीचे आमदार सुनील टिंगरे यांनी आरोपीला मदत केल्याचा आरोप आहे.

Pune Accident Update ( Marathi News ) :पुणे शहरातील कल्याणी नगर परिसरात झालेल्या अपघातात तरुण-तरुणीला आपला जीव गमवावा लागला. या दोघांना ज्या पोर्शे कारने धडक दिली त्या कारचा चालक असलेल्या तरुणाला तात्काळ जामीन मंजूर झाल्याने पुण्यासह राज्यभरात संताप व्यक्त केला जात आहे. राजकीय हस्तक्षेपामुळेच आरोपीला लवकर जामीन मिळाल्याचा आरोपही होत आहे. या प्रकरणात वडगावशेरी येथील राष्ट्रवादीचे आमदार सुनील टिंगरे यांनी आरोपीला मदत केल्याचा आरोप आहे. याप्रकरणी टिंगरे यांनी स्पष्टीकरण दिल्यानंतर आता राज्याचे उपमुख्यमंत्री आणि पुण्याचे पालकमंत्री असलेले अजित पवार हेदेखील ॲक्शन मोडवर आले असून त्यांनी पुण्याच्या पोलीस आयुक्तांना फोन करत आरोपीवर कारवाई करण्याच्या सूचना दिल्याचे समजते.

"कोणताही राजकीय हस्तक्षेप न होऊ देता आरोपींवर योग्य ती कायदेशीर कारवाई करा," अशा सूचना अजित पवारांकडून पोलीस आयुक्तांना देण्यात आल्या आहेत. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी यापूर्वीच पोलिसांना याबाबतच्या सूचना दिल्या होत्या. त्यानंतर आता अपघाताच्या तीन दिवसांनंतर अजित पवारांकडूनही पोलिसांना सूचना देण्यात आल्याने आगामी काळात आरोपींना खरंच कठोर शिक्षा होते का, हे पाहणं महत्त्वाचं ठरणार आहे.

आमदार सुनिल टिंगरे यांनी काय स्पष्टकरण दिलंय?

पुणे अपघातात आरोपीला काही तासांतच जामीन मंजूर झाल्यानंतर पोलीस प्रशासन आणि राजकीय नेत्यांविरोधात सोशल मीडियावर संताप व्यक्त करण्यात आला. या प्रकरणात स्थानिक आमदार सुनिल टिंगरे यांचं नाव येताच त्यांनी याबाबतचा खुलासा केला. ते म्हणाले की, "कल्याणीनगरमध्ये काल रात्री झालेल्या अपघातात दोघांचा झालेला मृत्यू ही अत्यंत दुःखद आणि दुर्दैवी घटना आहे. दोन्ही मृतांच्या कुटुंबियांच्या दुःखात मी सहभागी आहे आणि या अपघातात मृत्युमुखी पडलेल्या तरुण-तरुणीला न्यायव्यवस्थेच्या माध्यमातून नक्की न्याय मिळेल, असा मला विश्वासही आहे. तसेच दोषींवर कठोर कारवाई करण्यात येईल अशी आशा बाळगतो. या दुर्दैवी अपघाताशी माझा दुरान्वयेही संबंध नसताना कालपासून सोशल मिडियात काही घटकांकडून माझ्याविषयी चुकीची आणि बदनामीकारक माहिती प्रसारीत करण्यात येत आहे. याबाबत सुरवातीला दुर्लक्ष केलं परंतु विरोधकांकडून याचा गैरफायदा घेण्याचा प्रयत्न होत असल्याचं लक्षात आल्याने कालच्या घटनेबाबत सविस्तर भूमिका स्पष्ट करणं गरजेचं आहे."

आपली बाजू मांडताना सुनिल टिंगरे यांनी पुढे म्हटलं आहे की, "माझ्या मतदारसंघात मोठा अपघात झाल्याची माहिती काल पहाटे ३ च्या सुमारास माझ्या कार्यकर्त्यांनी फोन करुन दिली. तसंच माझे परिचित विशाल आगरवाल यांनीही फोन केला आणि त्यांच्या मुलाचा ॲक्सिडेंट झाल्याचं सांगितलं. त्यानुसार जबाबदार लोकप्रतिनिधी म्हणून मी पहाटे प्रथम घटनास्थळावर आणि नंतर येरवडा पोलिस ठाण्यात गेलो. यावेळी पोलिस ठाण्यात चौकशी केली असता पोलिस निरक्षक हे अपघातातील तरुण-तरुणींना हॉस्पिटलमध्ये घेऊन गेल्याचं सांगण्यात आलं. मी त्यांना फोन केला असता १५ मिनिटात येत असल्याचं त्यांनी सांगितलं आणि त्यानुसार ते आलेही. पोलिस स्टेशनला आल्यानंतर पीआय साहेबांनी अपघाताचा संपूर्ण घटनाक्रम सांगितला. त्यानुसार आपण दोषींवर कठोर कायदेशीर कारवाई करावी, अशा सूचना देऊन मी तिथून निघून आलो. मी पोलिसांवर कोणताही दबाव आणला नाही हे पोलिस अधिकारीही कबूल करतील, यात शंका नाही. म्हणूनच काल सकाळी ६ वाजता याप्रकरणी गुन्हाही दाखल झाला आणि पुढील न्यायालयीन प्रक्रियाही झाली. दरम्यान, या अपघातप्रकरणी मी पोलिसांवर दबाव आणल्याचा खोडसाळपणा काही घटकांकडून सोशल मीडियात केला जातोय. यामुळं माझी सार्वजनिक व राजकीय जीवनात बदनामी होण्याची शक्यता असल्याने वस्तुस्थिती याठिकाणी नमूद केली आहे. वास्तविक मी पहिल्यापासून ‘नाईट लाईफ’च्या विरोधात आहे आणि याबाबत वेळोवेळी आवाजही उठवला आहे. विमाननगर, कल्याणीनगर, खराडी या उच्चभ्रू भागात रात्री उशिरापर्यंत अवैधरित्या सुरु असलेले पब, बार आणि टेरेस हॉटेल तसंच दारु विक्री, मटका धंदा, हुक्का पार्लर, पत्त्याचे क्लब, अमली पदार्थांची विक्री, मसाज पार्लर या अवैध धंद्यांवर कारवाई करण्याबाबत मी पोलिस आयुक्तांना यापूर्वी पत्रही दिलं आहे आणि विधानसभेतही यासंदर्भात आवाज उठवला आहे. तसंच कल्याणीनगरमधील रहिवाशांसोबत पोलिस आयुक्त साहेबांची प्रत्यक्ष भेट घेउनही त्यांच्या निदर्शनास हा प्रकार आणून दिला आहे. शिवाय यापुढेही या अवैध व्यवसायांना माझा नेहमीच विरोध असेल. परंतु एखाद्या अपघाताशी कोणताही संबंध नसताना नाव जोडणं हे चुकीचं आणि बदनामीकारक आहे. सूज्ञ नागरिक या अपप्रचाराला बळी पडणार नाहीत, असा विश्वास आहे," असं आमदार टिंगरे यांनी आपल्या पोस्टमध्ये म्हटलं आहे.