निवडणूक आयोगाच्या एसआयआर मोहिमेच्या बैठकीला जाताना अपघात; पुण्यात ‘बीएलओ’ प्राध्यापकाचा मृत्यू

धानोरी-लोहगाव रस्त्यावर त्यांची दुचाकी घसरली, या अपघातात प्राध्यापकाच्या चेहऱ्याला गंभीर दुखापत होऊन मोठ्या प्रमाणावर रक्तस्त्राव झाला

लोहगाव : केंद्रीय निवडणूक आयोगाच्या 'मतदार यादी सखोल पुनर्निरीक्षण' (एसआयआर) मोहिमेच्या तातडीने बोलावलेल्या बैठकीला जात असताना, लोहगाव येथे एका ४० वर्षीय प्राध्यापकाचा दुर्दैवी अपघातीमृत्यू झाला. ज्ञानेश्वर रोटे असे या प्राध्यापकाचे नाव आहे. कामाच्या प्रचंड तणावामुळेच हा अपघात झाल्याचा आरोप शिक्षक संघटनांनी केला आहे.

मिळालेल्या माहितीनुसार, प्राध्यापक ज्ञानेश्वर रोटे (रा. रोटेवाडी, अहिल्यानगर) हे वडगाव शेरी मतदारसंघात 'बीएलओ' म्हणून कार्यरत होते. सोमवारी (१३ एप्रिल) दुपारी साडेबाराच्या सुमारास उपजिल्हाधिकाऱ्यांनी बोलावलेल्या तातडीच्या बैठकीसाठी ते दुचाकीवरून निघाले होते. धानोरी-लोहगाव रस्त्यावरील स्पार्क स्प्रिंग सोसायटीसमोर त्यांची दुचाकी घसरली. या अपघातात त्यांच्या चेहऱ्याला गंभीर दुखापत होऊन मोठ्या प्रमाणावर रक्तस्त्राव झाला. एका स्थानिक तरुणाने त्यांना तातडीने खासगी रुग्णालयात दाखल केले, मात्र उपचारादरम्यान त्यांचा मृत्यू झाला.

कौटुंबिक पार्श्वभूमी

प्राध्यापक रोटे हे मूळचे अहिल्यानगर जिल्ह्यातील असून, त्यांची अलीकडेच इंदापूर तालुक्यातील कळंब येथून लोहगाव येथे बदली झाली होती. त्यांच्या पश्चात पत्नी, ११ वर्षांची मुलगी आणि ६ वर्षांचा मुलगा असा परिवार आहे. लोहगाव पोलिसांनी सध्या या घटनेची 'आकस्मिक मृत्यू' म्हणून नोंद केली असून, मृतदेह शवविच्छेदनासाठी ससून रुग्णालयात पाठवण्यात आला आहे.