तीन वर्षाच्या लेकीचा होता वाढदिवस, आई वडिलांसह चिमुकलीचा घरात मिळाला मृतदेह; पोलिसांनी सांगितलं काय घडलं? 

Parents and Daughter Death: मन सुन्न करणारी एक घटना समोर आली आहे. तीन वर्षाच्या चिमुकलीचा वाढदिवस होता, त्याच दिवशी तिचा आईवडिलांसह घरात मृतदेह आढळून आला.

Parents and Daughter Death: मन सुन्न करणारी एक घटना समोर आली आहे. तीन वर्षाच्या चिमुकलीचा वाढदिवस होता, त्याच दिवशी आईवडिलांनी आधी तिची गळफास देऊन मारले आणि नंतर स्वतःही आत्महत्या केली. 

तीन वर्षाच्या अद्विकाचा वाढदिवस होता. ती तीन वर्षांची झाली होती. घरात आनंदाचं वातावरण होतं, पण काही क्षणातच संपूर्ण कुटुंब दुःखाच्या डोहात बुडाले. तीन वर्षाची अद्विका, तिचे वडील जतिंद्र कुमार (वय ३०) आणि आई मंजू (वय २८) या तिघांचेही घरात लटकलेल्या अवस्थेत मृतदेह मिळाले. 

जतिंद्र कुमार हे रेल्वे मेल विभागात नोकरीला होते. ते कुटुंबासह हरयाणातील कुरुक्षेत्रमध्ये अलेल्या प्रेमनगर कॉलनीमध्ये राहत होते. सोमवारी (२० एप्रिल) पहाटे सहा वाजता सुभाष मंडी पोलिसांना कॉल आला की, प्रेमनगर कॉलनीतील एका घरात तीन लोकांनी फाशी घेतली आहे. 

घरातील दृश्य बघून पोलीस हादरले 

पोलीस घटनास्थळी पोहोचले. घरात पती-पत्नी आणि तीन वर्षाच्या अद्विकाचा मृतदेह गळफास घेतलेल्या अवस्थेत होता. ते दृश्य बघून पोलिसही हादरले. तिघांचे मृतदेह खाली उतरवण्यात आले आणि नंतर शवविच्छेदनासाठी पाठवण्यात आले. 

लेकीसह आईवडिलांनी जीवन का संपवले?

पोलिसांनी प्राथमिक तपासानंतर सांगितले की, तीन वर्षाच्या अद्विकाला गंभीर आजार होता. तिच्या आजारपणामुळे आईवडिल सतत चिंतेत राहत होते. तिच्या आजारामुळेच तणावाखाली असलेल्या आईवडिलांनी हा निर्णय घेतला आणि मुलीसह स्वतःचे आयुष्य संपवले. 

मयत जतिंद्र यांच्या बहिणीच्या सासऱ्याने सांगितले की, जतिंद्र कुमारने ही घटना घडण्यापूर्वी माझ्या मुलाला व्हॉट्सअपवर मेसेज केला होता. माझा मुलगा जीम ट्रेनर आहे आणि पहाटे पाच वाजताच त्याला मेसेज आला होता. मेसेज मिळताच तो घरी गेला, पण तोपर्यंत उशीर झाला होता. या घटनेनंतर संपूर्ण कुटुंब आणि नातेवाईकांवर आघात झाला आहे.