नवी दिल्ली: राजधानी दिल्लीमधून एक धक्कादायक घटना घडली आहे. दिल्लीच्या पटेल नगर भागात एका व्यक्तीचा निर्घृणपणे खून झाला आहे. कामावरुन घरी परतत असलेल्या एका इलेक्ट्रीशियनला दरोडेखोरांनी दरोड्याचा प्रतिकार केल्यावर भोसकून हत्या केली. पोलिसांच्या हाती घटनेचे सीसीटीव्ही फुटेज लागले आहे, ज्यात आरोपी गुन्ह्यानंतर पळून जाताना दिसत आहेत.
याबाबत सविस्तर माहिती अशी की, 42 वर्षीय मनोज कुमार कुटुंबासह फरीदपुरी, पश्चिम पटेल नगर येथे राहायचे. शुक्रवारी संध्याकाळी ते बलजीत नगर येथून काम करुन घरी परतत असताना 3 मुलांनी त्यांना लुटण्याच्या उद्देशाने अडवले. पण, मनोजने याचा विरोध केल्यामुळे आरोपींनी मनोजला अनेकवेळा चाकू भोसकला, ज्यात मनोजचा मृत्यू झाला.
पोलिसांच्या हाती लागलेल्या सीसीटीव्ही फुटेजमध्ये आरोपी पळून जाताना दिसत आहेत. पोलिसांना मनोजचे वॉलेट, फोन आणि सोन्याची अंगठी गायब असल्याचे आढळून आले. पोलिसांनी खून आणि दरोड्याचा गुन्हा दाखल केला आहे. पोलिसांचा दावा आहे की त्यांना आरोपींविषयी अनेक महत्त्वाचे संकेत मिळाले आहेत आणि लवकरच त्यांना अटक केली जाईल. सध्या या प्रकरणाचा अधिक तपास सुरू आहे.