शिंदेसेनेच्या नगरसेवकांना १५४ कोटी; भाजपच्या वाट्याला केवळ ३ कोटी

भाजपची आगपाखड; शिंदेसेनेने आरोप फेटाळले, एमआयएमलाही चांगला निधी दिल्याचा दावा

लोकमत न्यूज नेटवर्क 
ठाणे : मुंबई पालिकेत ठराविक नगरसेवकांनाच कोट्यवधींचा निधी दिल्यावरून वाद सुरू असताना ठाण्यात सत्तेत असून, तीन महासभेत मंजूर  कामांमध्ये केवळ १० टक्केच निधी मिळाल्याची आगपाखड भाजपने केली आहे. शिंदेसेनेच्या नगरसेवकांच्या प्रभागांसाठी १५४.३० कोटींचा निधी मंजूर केला , तसेच विरोधी बाकावरील दोन्ही राष्ट्रवादींसह एमआयएमलाही चांगला निधी दिल्याचा दावा भाजपचा आहे. परंतु शिंदेसेनेने आरोप फेटाळला आहे.

 ठामपाच्या निधी वाटपाची आकडेवारी भाजपने समोर आणली. नुकत्याच झालेल्या महासभेतही ४३२ कोटींचे विषय मंजूर केल्याचा दावा भाजपचा आहे. यात ७० टक्के प्रस्ताव हे शिंदेसेनेच्या नगरसेवकांच्या प्रभागातील असून,  ३० ते ३२ कोटींची कामे विरोधी पक्षनेत्याच्या प्रभागासाठी मंजूर केल्याचा आरोपही भाजपचा आहे. भाजपच्या ५ प्रभागांसाठी केवळ ३.०५ कोटींच्या निधीचा प्रस्ताव मंजूर केला. दोन्ही राष्ट्रवादी, एमआयएमच्या प्रभागासाठी ४.४५ कोटींचा निधी मंजूर झाला आहे. 

मागील तीन महासभेत शिंदेसेनेच्या नगरसेवकांना १५४ कोटींचा निधी मंजूर झाला आहे. मात्र सत्तेत सोबत असतानाही आमच्या वाटेला केवळ ३.०५ कोटींचाच निधी देण्यात आला आहे. त्यातही मे महिन्यात झालेल्या महासभेत ४३२ कोटींच्या कामांच्या निधीमध्ये ७० टक्के निधी शिंदेसेनेच्याच नगरसेवकांना दिला आहे. त्यामुळे हा चुकीचा पायंडा पाडला जात आहे.
-कृष्णा पाटील, उपमहापौर, ठाणे

महासभेत आलेले प्रस्ताव हे प्रशासनाकडून आणण्यात आलेले असतात. त्यानंतर त्यावर महापौरांकडून चर्चा होते. अखेर गटनेत्यांच्या बैठकीत त्यावर अंतिम चर्चा होऊन महासभेत ते विषय मंजुरीसाठी आणले जातात. त्यामुळे सर्व आरोप चुकीचे आणि बिनबुडाचे आहेत.
हणमंत जगदाळे, सभागृह नेते, ठाणे महापालिका

विरोधी पक्षनेत्याला दीड कोटींचा निधी
दोन्ही राष्ट्रवादीसह एमआयएमला ४ कोटी ४५ लाखांचा निधी मिळाला आहे. राष्ट्रवादीचे (अजित पवार) नगरसेवक नजीब मुल्ला यांच्या प्रभाग क्रमांक १० ला २ कोटी, राष्ट्रवादी (शरद पवार)चे नगरसेवक तसेच विरोधी पक्षनेते शानू पठाण यांच्या प्रभाग क्रमांक ३२ ला १.५ कोटी, प्रभाग क्रमांक २६ ला ७० लाख, एमआयएमचे नगरसेवक असलेल्या प्रभाग क्रमांक ३० ला १३ लाख आणि प्रभाग क्रमांक ३३ ला १२ लाखांचा निधी मंजूर केला आहे.

शिंदेसेनेच्या नगरसेवकांना निधी
    प्र. क्र.     निधी (कोटी)
    १५    १५.५२
    २०     १४.०५
    २२     १३.३३ 
    १९     १३.२६ 
    २८         १२ 
    १         ११ 
    १६         ७.३९ 
    ६         ६.५ 
    १२ व १७         ५ (प्रत्येकी) 
    ७         ४.२७ 
    २४         ३.५७ 
    १८         २.६५ 
    ९         २.५ 
    ३         २ 
    ८         १.६० 
    २७         ७५ लाख
    १४, २५, २९     ५० लाख (प्रत्येकी)
    १३         ११ लाख
    ३१         ३ लाख