स्वातंत्र्यसैनिकांची पंढरी म्हणून ओळख असलेल्या तांबवे गावची व सभोवताली असणाऱ्या वाडी-वस्त्यांची या पुलामुळे सोय झाली होती. १९८० साली या पुलाचे बांधकाम सुरू करण्यात आले. २८ मार्च १९८१ रोजी बांधकाम पूर्ण होऊन पूल वाहतुकीसाठी खुला करण्यात आला होता. पुलामुळे या मार्गावरील दळणवळण सुकर झाली. पुलाचे उद्घाटन तत्कालीन मुख्यमंत्री बॅरिस्टर ए. आर. अंतुले यांच्या हस्ते झाले होते. त्या काळी हा पूल बांधण्यासाठी १४ लाख ८० हजार रुपये खर्च आला होता.
तांबवे गाव व सभोवताली असणाऱ्या डेळेवाडी, किरपे, आरेवाडी, गमेवाडी, टेळेवाडी, साजूर, पाठरवाडी, उत्तर तांबवे, दक्षिण तांबवे या गावांतील ग्रामस्थांना पूर्वी कोयना नदी ओलांडण्यासाठी नावेचा वापर करावा लागत होता. नदीला महापूर आला की गावची अवस्था बेटासारखी होत होती. दळवळण ठप्प होत होते. त्यामुळे हा पूल बांधण्यात आला. गत चाळीस वर्षांपासून अनेक घडामोडींचा साक्षीदार असणारा हा पूल २०१९ साली आलेल्या महापूरात आठ दिवस पाण्यात होता. त्याचे कॉलम कमकुवत झाले होते. त्यामुळे वाहतुकीसाठी तो बंद होता. १४ ऑगस्ट २०१९ रोजी पहाटे या पुलाचे पश्चिमेकडील दोन खांब कोसळले. तत्पूर्वी या पुलानजीकच १५ कोटी रुपये खर्च करून नवीन पुल बांधण्यात आला होता. त्यामुळे वाहतुकीची गैरसोय झाली नाही. हा नवीन पूल उद्घाटन न करताच वाहतुकीसाठी खुला करण्यात आला. सध्या नवीन पुलाला धोका होऊ नये, यासाठी जुना पूल पाडण्याचे काम सुरू आहे. हा पूल पाडण्यासाठी २० ते २५ लाख रुपये खर्च येणार आहे. याच जुन्या पुलाखाली गेल्या महिन्यात मासेमारी करणाऱ्या युवकांना तीन जिवंत बॉम्ब सापडले होते. त्यामुळे या पुलाची राज्यभर चर्चा झाली होती.
फोटो : १४केआरडी०६
कॅप्शन : तांबवे, ता. कऱ्हाड येथे कोयना नदीवर असलेला जुना पूल पाडण्यास सुरुवात करण्यात आली आहे. (छाया : दीपक पवार)