Satara News: नुने येथील थिनर कंपनीत आगीनंतर भीषण स्फोट !, ११ महिला; ३ पुरुष बालंबाल बचावले

वेळीच सर्वजण बाहेर आल्याने मोठा अनर्थ टळला. लाखो रुपयांचे नुकसान

सातारा/किडगाव : मेढा-सातारा रस्त्यावरील नुने, ता. सातारा परिसरात असणाऱ्या थिनर कंपनीला भीषण आग लागली. या आगीनंतर थिनरने भरलेल्या चार बॅलरचे स्फोट झाल्याने मोठी दहशत पसरली. या आगीतून ११ महिला आणि ३ पुरुष बालंबाल बचावले. कंपनीचे लाखो रुपयांचे नुकसान झाल्याचा प्राथमिक अंदाज वर्तविण्यात येत आहे. ही घटना सोमवारी दुपारी चारच्या सुमारास घडली.

घटनास्थळावरून मिळालेल्या माहितीनुसार, सातारा-मेढा रस्त्यावर नुने, ता. सातारा गावच्या हद्दीत रंगकामासाठी लागणारे थिनर बनविण्याची कंपनी आहे. या ठिकाणी मोठे पत्र्याचे शेड उभारले आहे. त्यामध्ये ११ महिला आणि ३ पुरुष काम करत होते. सोमवारी दुपारी कंपनीच्या उत्पादन विभागातून अचानक धूर निघू लागला.

काही क्षणातच आगीने रौद्ररूप धारण केले. कंपनीतील कामगार महिला व पुरुष प्रसंगावधान राखून धावतच बाहेर आले. त्यानंतर काही क्षणातच एकापाठोपाठ एक असे चार स्फोट झाले. वेळीच सर्वजण बाहेर आल्याने मोठा अनर्थ टळला.

कंपनीमध्ये केमिकल पदार्थ मोठ्या प्रमाणावर असल्याने आग वेगाने पसरली. सातारा, वाई येथूनही आठ ते दहा अग्निशमन दलाच्या गाड्या काहीवेळानंतर घटनास्थळी पोहोचल्या. अग्निशमन दलाच्या जवानांकडून आग नियंत्रणात आणण्यासाठी शर्थीचे प्रयत्न सुरू होते. मात्र, आग आटोक्यात येत नव्हती. रात्री दहाच्या सुमारास आग नियंत्रणात आणण्यात जवानांना यश आले.

बघ्यांमुळे वाहतूक कोंडी

महाबळेश्वर-सातारा रस्त्यावर नेहमीच रहदारी असते. या आगीमुळे वाहतूक बराचवेळ ठप्प झाली होती. वाहनांच्या रांगा लागल्या. आग पाहण्यासाठी नागरिकांनी रस्त्याच्या दोन्ही बाजूंनी मोठी गर्दी केल्याने वाहतुकीला अडथळा निर्माण झाला. सातारा तालुका पोलिसांनी तत्काळ घटनास्थळी धाव घेत वाहतूक सुरळीत केली.

ही कंपनी बागवान नावाच्या व्यक्तीची आहे. आग नेमकी कशामुळे लागली, हे अद्याप समोर आले नाही. पंचनामा केल्यानंतरच आगीचे कारण समोर येईल. कंपनीतील सर्व कामगार सुखरुप आहेत. - शिवाजी वायदंडे, बीट अंमलदार सातारा तालुका पोलिस