पुणे शहरात ५६ ठिकाणी पावसाच्या पुराचा धोका कायम

महापालिका आयुक्तांनी सोमवारी विभाग प्रमुखांच्या बैठकीत पावसाळापूर्व कामांचा आढावा घेतला.

पुणे : शहरातील पावसाचे पाणी साचणाऱ्या ५६ ठिकाणी कायमस्वरूपी उपाय योजना करणे खर्चीक आणि वेळ खाणारे असल्याने या ठिकाणी तात्पुरत्या स्वरूपाच्या उपाययोजना करण्याचे आदेश महापालिका आयुक्त नवल किशोर राम यांनी दिले आहेत. त्यामुळे या ५६ ठिकाणी पावसाळ्यात पूरस्थिती निर्माण होण्याचा धोका कायम राहणार असल्याचे स्पष्ट झाले आहे.

महापालिका आयुक्तांनी सोमवारी विभाग प्रमुखांच्या बैठकीत पावसाळापूर्व कामांचा आढावा घेतला. शहरात पावसाळ्यात पाणी साचणारी सुमारे १२० ठिकाणे निश्चित करण्यात आली असून, त्या ठिकाणी सुरू असलेल्या कामांची स्थिती तपासण्यात आली. यावेळी प्रशासनाने सादर केलेल्या अहवालानुसार, १२० पैकी ५६ ठिकाणी नवीन पावसाळी वाहिन्या टाकणे, चेंबर बांधणे, जुन्या वाहिन्या बदलणे आणि पावसाच्या पाण्याच्या निचऱ्यासाठी जाळे विकसित करणे, अशी मोठ्या स्वरूपाची कामे करणे आवश्यक आहे. या कामांसाठी मोठ्या निधीसह किमान सहा ते आठ महिन्यांचा कालावधी लागणार असल्याने ती यंदाच्या पावसाळ्यापूर्वी पूर्ण होणे शक्य नाही. त्यामुळे या ५६ ठिकाणी तात्पुरत्या स्वरूपाच्या उपाययोजना करण्याचे आदेश महापालिका आयुक्त नवल किशोर राम यांनी दिले आहेत.

संबंधित क्षेत्रीय कार्यालयांना तातडीने पाणी निचरा करण्यासाठी आवश्यक यंत्रणा सज्ज ठेवण्याचे निर्देश देण्यात आले. पूरस्थिती उद्भवल्यास त्वरित प्रतिसाद देता यावा, यासाठी मनुष्यबळ, यंत्रसामुग्री आणि अन्य उपाययोजना उपलब्ध ठेवण्यासह उर्वरित ६४ ठिकाणांवरील कामे पुढील महिन्याभरात पूर्ण करण्याचे आदेश आयुक्तांनी यावेळी दिले.