तडीपार केल्यानंतरही परिसरात दहशत माजवणारा गुंड गजाआड

पुणे : शहरातून तडीपार केल्यानंतर बिबवेवाडी भागात दहशत माजवणाऱ्या गुंडाला पोलिसांनी अटक केली. त्याच्याविरोधात पोलिसांनी गुन्हा दाखल केला. अविनाश उर्फ ताऊ अर्जुन जोगन (वय २८, रा. शेळके वस्ती, बिबवेवाडी) असे अटक करण्यात आलेल्याचे नाव आहे. तडीपार केल्यानंतर आदेशाचा भंग करणे, तसेच दहशत माजवल्याप्रकरणी जोगन याच्याविरोधात बिबवेवाडी पोलिस ठाण्यात गुन्हा दाखल करण्यात आला आहे. 

जोगन याला परिमंडळ दोनचे पाेलिस उपायुक्त मिलिंद मोहिते यांनी पुणे, पिंपरी-चिंचवड शहर, जिल्ह्यातून १४ ऑक्टोबर २०२५ रोजी दोन वर्षांसाठी तडीपार करण्याचे आदेश दिले होते. तडीपार केल्यानंतर तो शहरात आला होता. बिबवेवाडीतील शेळके वस्तीत कोयता उगारून त्याने दहशत माजवल्याची घटना नुकतीच घडली.

या घटनेची माहिती पोलिसांना मिळाल्यानंतर त्याचा शोध घेऊन ताब्यात घेण्यात आले. ही कामगिरी उपायुक्त मिलिंद मोहिते, एसीपी राहुल आवारे यांच्या मार्गदर्शनाखाली बिबवेवाडी पोलिस ठाण्याच्या वरिष्ठ पोलिस निरीक्षक अश्विनी सातपुते यांच्या मार्गदर्शनाखाली पथकाने केली.