Crime News : पुणे हादरलं..! घरगुती वादातून बापानेच ३० वर्षीय मुलावर फेकलं ॲसिड

Crime News : आरोपी व त्याचा अंदाजे ३० वर्षीय मुलगा यांच्यात काही दिवसांपासून घरगुती कारणांवरून वाद सुरू होता.

पुणे - कोथरूड परिसरातील केळेवाडी येथे घरगुती वादाचे रूपांतर थेट जीवघेण्या हल्ल्यात झाल्याची धक्कादायक घटना उघडकीस आली आहे. संतापाच्या भरात एका बापाने स्वतःच्या मुलावर ॲसिड फेकल्याने परिसरात भीतीचे वातावरण निर्माण झाले आहे.

अधिकच्या माहितीनुसार, आरोपी व त्याचा अंदाजे ३० वर्षीय मुलगा यांच्यात काही दिवसांपासून घरगुती कारणांवरून वाद सुरू होता. शुक्रवारी रात्री हा वाद पुन्हा उफाळून आला. दोघांमध्ये जोरदार बाचाबाची झाल्यानंतर संतापलेल्या वडिलांनी मुलाच्या अंगावर ॲसिड फेकल्याची माहिती समोर आली आहे. या हल्ल्यात मुलगा गंभीररीत्या भाजला गेला असून त्याला तातडीने रुग्णालयात दाखल करण्यात आले. डॉक्टरांकडून त्याच्यावर उपचार सुरू असून त्याची प्रकृती चिंताजनक असल्याची प्राथमिक माहिती आहे.

घटनेची माहिती मिळताच पोलिसांनी तातडीने घटनास्थळी धाव घेतली. आरोपी वडिलांना पोलिसांनी ताब्यात घेतले असून त्यांच्याकडे चौकशी सुरू आहे. नेमका वाद कोणत्या कारणावरून झाला आणि हल्ल्यासाठी वापरण्यात आलेले ॲसिड कुठून आणले, याचा तपास पोलीस करत आहेत. या घटनेमुळे केळेवाडी परिसरात मोठी खळबळ उडाली असून नागरिकांकडून संताप व्यक्त केला जात आहे.