२०५ तक्रारी, १५ कोटींची फसवणूक... देशभरातील लोकांना लुटणाऱ्या आरोपीचा पर्दाफाश

बिहारच्या बेगुसरायमध्ये सायबर पोलिसांनी आर्थिक फसवणुकीशी संबंधित एका मोठ्या प्रकरणात आरोपीला अटक केली आहे. पोलिसांनी दिलेल्या माहितीनुसार, एका संशयास्पद बँक खात्याबाबत देशभरातून तब्बल २०५ तक्रारी दाखल झाल्यानंतर ही कारवाई करण्यात आली. तपासात असं समोर आलं आहे की, गेल्या आठ महिन्यांत या खात्यातून १५ कोटी २५ लाख ३५ हजार ३०७ रुपयांचं फ्रॉड ट्रान्झॅक्शन झाले आहेत.

सायबर डीएसपी इमरान अहमद यांनी दिलेल्या माहितीनुसार, या खात्याविरुद्ध 'नॅशनल सायबर क्राईम रिपोर्टिंग पोर्टल' (NCRP) वर देशातील विविध राज्यांमधून अनेक तक्रारी नोंदवल्या गेल्या होत्या. अटक करण्यात आलेल्या आरोपीचं नाव सुनील कुमार असं आहे. पोलीस पथक गेल्या अनेक दिवसांपासून त्याचा शोध घेत होते आणि आता अचूक माहितीच्या आधारे त्याला अटक करण्यात आली आहे.

या प्रकरणी सायबर पोलीस ठाणे बेगुसराय येथे गुन्हा नोंदवून पुढील कायदेशीर कारवाई सुरू करण्यात आली आहे. पोलीस आता या नेटवर्कशी जोडलेल्या इतर लोकांचा शोध घेत आहेत. एका संशयास्पद खात्याबाबत देशभरातून सातत्याने तक्रारी आल्यानंतर हे प्रकरण उघडकीस आलं. सायबर पोलिसांनी या खात्याची कसून चौकशी केली आणि आठ महिन्यांच्या बँक स्टेटमेंटची छाननी केली, ज्यामध्ये कोट्यवधी रुपयांच्या संशयास्पद व्यवहारांचा खुलासा झाला.

१५ कोटी २५ लाख ३५ हजार ३०७ रुपयांची फसवणूक

तपासात असं आढळून आलं की, एकूण १५ कोटी २५ लाख ३५ हजार ३०७ रुपयांची फसवणुकीची रक्कम या खात्यात ट्रान्सफर करण्यात आली होती. देशातील वेगवेगळ्या राज्यांमधून या खात्याविरुद्ध २०५ तक्रारी दाखल झाल्या होत्या. पोलिसांनी दिलेल्या माहितीनुसार, ही रक्कम शेकडो लोकांची फसवणूक करून या खात्यात पाठवण्यात आली होती. एकाच खात्याच्या माध्यमातून इतक्या मोठ्या रकमेची देवाणघेवाण झाल्याचं समोर आल्यानंतर पोलीसही चक्रावून गेले. यानंतर आरोपीचा घेण्यात आला.

आरोपीचे धक्कादायक खुलासे

अटकेनंतर झालेल्या चौकशीत आरोपीने अनेक धक्कादायक खुलासे केले. सायबर गुन्हेगारांच्या सिंडिकेटला आपण हे बँक खातं ३,७५,००० रुपयांना विकलं असल्याची कबुली त्याने दिली आहे. आरोपीने चौकशीदरम्यान या रॅकेटशी संबंधित इतर तीन मास्टरमाइंडची नावंही पोलिसांना सांगितली आहेत. पोलीस आता हे संपूर्ण नेटवर्क उद्ध्वस्त करण्यासाठी पुढील कारवाई करत आहेत.