शिरूर : शिरूर शहर व तालुक्यात मॅफेड्रॉन (एमडी) या अमली पदार्थाची विक्री करण्यासाठी आता डिलिव्हरी ॲपचा वापर होत असल्याचा धक्कादायक प्रकार उघडकीस आला आहे. पुणे ग्रामीण पोलिसांच्या स्थानिक गुन्हे शाखा व शिरूर पोलिसांनी संयुक्त कारवाई करत ४७ ग्रॅम एमडीसह सुमारे २१ लाख ५२ हजार रुपयांचा मुद्देमाल जप्त केला असून, तिघांना अटक केली आहे.
विशाल मारुती मोर (रा. बाफणामळा, शिरूर), प्रतीक संतोष लंघे (रा. करडे, ता. शिरूर) आणि मिथुन विजयपाल सिंग (रा. रामलिंग रोड, सवतमाळी नगर, शिरूर) अशी अटक करण्यात आलेल्या आरोपींची नावे आहेत.
पोलिसांनी दिलेल्या माहितीनुसार, १७ एप्रिलला स्थानिक गुन्हे शाखेला न्हावरा फाटा ते बाबुरावनगर मार्गावर संशयास्पद हालचालींबाबत माहिती मिळाली. शिवसाईलीला मंगल कार्यालयासमोर उभ्या असलेल्या दोन चारचाकी गाड्यांमध्ये काहीजण एमडीची विक्री करत असल्याचे समजताच पोलिसांनी सापळा रचून छापा टाकला. तपासादरम्यान आरोपींकडून ४७.६० ग्रॅम एमडी ड्रग्ज जप्त करण्यात आले. तसेच गुन्ह्यात वापरलेल्या दोन चारचाकी वाहनांसह एकूण २१ लाख ५२ हजार रुपयांचा मुद्देमाल पोलिसांनी हस्तगत केला.
चौकशीदरम्यान या आरोपींकडून एमडी विक्रीसाठी ‘पोर्टर’ या डिलिव्हरी ॲपचा वापर केल्याचे समोर आले आहे. ग्राहकांकडून ऑर्डर घेतल्यानंतर ड्रग्ज पॅक करून डिलिव्हरी ॲपमार्फत ते पोहोचवले जात होते, अशी माहिती पोलिसांनी दिली. या ॲपच्या माध्यमातून ड्रग्ज घेणाऱ्या ग्राहकांचा शोध सुरू असून, त्यांची वैद्यकीय तपासणीही केली जाणार आहे. ही कारवाई अपर पोलिस अधीक्षक रमेश चोपडे, विभागीय अधिकारी प्रशांत ढोले, स्थानिक गुन्हे शाखेचे पोलिस निरीक्षक प्रमोद क्षीरसागर व शिरूरचे पोलिस निरीक्षक संदेश केंजळे यांच्या मार्गदर्शनाखाली करण्यात आली. सहायक निरीक्षक राहुल गावडे, अभिजित सावंत, शुभम चव्हाण यांच्यासह पोलिस पथकाने ही यशस्वी कारवाई केली.
Web Summary : Pune police busted a drug racket in Shirur, where the Porter app was used for MD delivery. Three arrested, ₹21.52 lakh seized.
Web Summary : पुणे पुलिस ने शिरूर में एक ड्रग रैकेट का भंडाफोड़ किया, जहाँ एमडी डिलीवरी के लिए पोर्टर ऐप का इस्तेमाल किया गया था। तीन गिरफ्तार, ₹21.52 लाख जब्त।