आईस्क्रीम विक्रेत्याने १४ वर्षीय मतिमंद मुलीचा केला विनयभंग

Pune crime - मुळशी तालुक्यातील घटनाः शोधमोहीम राबवत आरोपीला पकडून पोलिसांच्या स्वाधीन केले

कोळवण : मुळशी तालुक्यातील एका गावात आईस्क्रीम विक्रीच्या बहाण्याने फिरणाऱ्या विक्रेत्याने १४ वर्षीय मतिमंद मुलीचा विनयभंग केल्याची संतापजनक घटना बुधवारी (दि. २९) दुपारी घडली.

या प्रकारामुळे परिसरात तीव्र संताप व्यक्त होत असून, आरोपीवर कठोर कारवाईची मागणी नागरिकांकडून केली जात आहे. दुपारी सुमारे २ वाजण्याच्या सुमारास दुचाकीवरून आईस्क्रीम विकण्यासाठी आलेल्या विक्रेत्याकडे पीडित मुलगी आपल्या लहान चुलत बहिणीसह आईस्क्रीम घेण्यासाठी गेली होती. यावेळी आरोपी पिंटू शिवकुमार (सध्या रा. सूस, ता. मुळशी, जि. पुणे; मूळ रा. उत्तर प्रदेश) याने आईस्क्रीम देण्याच्या बहाण्याने मुलीला जवळ घेत

तिचा विनयभंग केला. या घडलेल्या प्रकाराने घाबरलेल्या मुलीने आरडाओरडा करत तातडीने घरी धाव घेतली व पालकांना सर्व प्रकार सांगितला. दरम्यान, आरोपी घटनास्थळावरून दुचाकीवरून पळून गेला. मात्र, संतप्त पालक आणि शेजाऱ्यांनी परिसरात शोधमोहीम राबवत आरोपीला पकडून पौड पोलिस ठाण्याच्या स्वाधीन केले. या प्रकरणी पौड पोलिसांनी तातडीने गुन्हा दाखल केला असून, आरोपीविरुद्ध भारतीय न्याय संहिता (BNS) कलम ७४ तसेच पोक्सो कायदा २०१२ अंतर्गत कलम ८ व १२ प्रमाणे गुन्हा नोंदवण्यात आला आहे.