Pune accident :पुण्यात थरार..! आप्पा बळवंत चौकात धडक, बस थेट दुकानात;सुदैवाने जीवितहानी नाही

Pune accident - या अपघातात दुकानाचे मोठे नुकसान झाले असून, लाखो रुपयांची हानी झाल्याचा अंदाज व्यक्त करण्यात येत आहे.

पुणे - शहरातील मध्यवर्ती व गजबजलेल्या आप्पा बळवंत चौकात  आज दुपारी एक धक्कादायक अपघात घडला. भरधाव वेगात येणारी पीएमपीएल बस अचानक नियंत्रण सुटून थेट एका दुकानात घुसली. या अपघातात दुकानाचे मोठे नुकसान झाले असून, लाखो रुपयांची हानी झाल्याचा अंदाज व्यक्त करण्यात येत आहे. 

प्रत्यक्षदर्शींनी दिलेल्या माहितीनुसार, बस वेगात येत असताना अचानक चालकाचे नियंत्रण सुटले आणि बस थेट रस्त्याच्या कडेला असलेल्या दुकानावर आदळली. अपघातानंतर परिसरात एकच गोंधळ उडाला आणि नागरिकांनी घटनास्थळी धाव घेतली. सुदैवाने, या घटनेत कोणतीही जीवितहानी झालेली नाही. मात्र, दुकानातील साहित्य पूर्णपणे उद्ध्वस्त झाल्यामुळे व्यापाऱ्याला मोठा आर्थिक फटका बसला आहे.

नुकसानाचा आकडा लाखोंमध्ये असल्याचा दावा दुकानमालकाने केला आहे. दरम्यान, बस चालकाने प्राथमिक माहितीत ब्रेक फेल झाल्यामुळे हा अपघात घडल्याचे सांगितले आहे. या दाव्याची अधिकृत पुष्टी अद्याप झालेली नसून, संबंधित यंत्रणा घटनेचा तपास करत आहेत.