राष्ट्रवादी काँग्रेस आमदारांच्या कारने चार वर्षांच्या बालिकेला उडविले; प्रकृती गंभीर

शिरूरला प्रचारासाठी जात असताना घडली घटना

लोकमत न्यूज नेटवर्क शिरूर : शिरूर नगर परिषदेच्या प्रचारासाठी पुण्याकडून शिरूरकडे निघालेल्या आमदार ज्ञानेश्वर कटके यांच्या भरधाव कारने ४ वर्षीय बालिकेला जोरदार धडक दिल्याची घटना रविवारी (दि. ३०) दुपारी शिरूरच्या बोऱ्हाडेमळा येथे पुणे-अहिल्यानगर महामार्गावर घडली. यातील जखमी बालिकेची प्रकृती गंभीर आहे. शुभ्रा पंढरीनाथ बोऱ्हाडे (वय ४) असे या अपघातात गंभीर झखमी झालेल्या बालिकेचे नाव आहे.

प्रत्यक्षदर्शींनी दिलेल्या माहितीनुसार, आमदार ज्ञानेश्वर कटके हे वाघोली येथून शिरूर नगरपरिषदेच्या प्रचारासाठी रविवारी दुपारी शिरूर येथे येत होते. बोऱ्हाडे मळा येथील हुंदाई शोरूम समोर शुभ्रा बोऱ्हाडे ही चार वर्षीय बालिका महामार्ग ओलांडत होती. एका कारच्या आडून ती अचानक आमदार कटके यांच्या काळ्या रंगाच्या मर्सिडीज कार समोर आली. कटके यांच्या चालकाने जोरदार ब्रेक दाबला परंतु गाडीच्या वेगामुळे शुभ्राला समोरासमोर जोराची धडक बसली. यात ती चेंडूसारखी उडून काही फुट अंतरावर डांबरी रस्त्यावर पडली. यात तिला गंभीर मार लागला असून, दात पडून जबड्याला जबर जखम झाल्याचे प्रत्यक्षदर्शींनी सांगितले. गाडीची धडक बसताच नागरिकांनी घटनासथळाकडे धाव घेतली. आमदार कटके व त्यांच्या कार्यकर्त्यांनी कारमधून खाली धाव घेत शुभ्रा हिला मदत करत उचलले. कटके यांनी दुसऱ्या कारमधून शिरूर गाठले तर त्यांच्याच कारमधून शुभ्रा हिला तातडीने शिरूरच्या वात्सल्य हॉस्पिटलमध्ये दाखल केले. या ठिकाणी तिच्यावर प्रथमोपचार करण्यात आले. मात्र तिची प्रकृती गंभीर असल्याने तिला पुढील उपचारासाठी पुणे येथे हलवण्यात आले.

दरम्यान शिरूर नगरपरिषदेचा प्रचार शिगेला पोहचला आहे. शिरूरची निवडणूक आजी-माजी आमदारांनी प्रतिष्ठेची केली आहे. प्रचाराला वेळेत पोहचण्यासाठी नेते मंडळींची एकच धावपळ उडाली आहे. आज शिरूर येथे प्रचारातील पदयात्रेला पोहचण्यासाठी आमदार कटके वाघोली येथून शिरूरला भरधाव चालले असताना हा अपघात घडला आहे. पुढऱ्यांची हीच धावपळ शुभ्रा सारख्या सर्वसामान्य बालिकेच्या जीवावर बेतल्याची चर्चा शिरूर शहर व तालुक्यात रंगली आहे.

पोलिस प्रशासनाची लपवाछपवी

आमदार कटके यांच्याच कारने चार वर्षीय बालिकेला उडवल्याची माहिती हा हा म्हणता संपूर्ण शिरूर शहरात पसरली मात्र या घटनेबाबत आमच्यापर्यंत ना रुग्णाल्याकडून खबर आली, ना तक्रार करण्यासाठी कोणी आले. यामुळे या घटनेबाबत आम्हाला काहीच माहिती नसल्याचे पोलिस प्रशासनाकडून सांगण्यात येत होते. ही लपवाछपवी कशासाठी केली जात होती? की आमदारांकडून पोलिसांवर दबाव टाकण्यात आला होता अशी चर्चा शिरूर शहरात सुरू होती.