होर्मुझचा मार्ग मोकळा, तेल-वायूच्या किमती कोसळल्या! भारतासाठी 'अच्छे दिन'; जाणून घ्या काय होणार स्वस्त?

इराणने ४९ दिवसांच्या युद्धविरामानंतर होर्मुझची सामुद्रधुनी सर्व व्यापारी जहाजांसाठी पुन्हा खुली केली आहे, यामुळे जागतिक ऊर्जा बाजारांना दिलासा मिळाला आहे. तेलाच्या किमती जवळपास १० टक्क्यांनी आणि गॅसच्या किमती ८.५ टक्क्यांनी घसरल्या आहेत.

इराणने शुक्रवारी होर्मुझची सामुद्रधुनी खुली केली. हा मार्ग ४९ दिवसांनंतर पुन्हा खुला करण्यात आला. आता युद्धविरामाच्या उर्वरित कालावधीसाठी तो जलवाहतुकीसाठी पूर्णपणे खुला झाला आहे. या बातमीमुळे ऊर्जा बाजाराला मोठा दिलासा मिळाला असून तेल व वायूच्या किमती कोसळल्या. तेलाच्या किमती जवळपास १० टक्क्यांनी आणि वायूच्या किमती ८.५ टक्क्यांनी घसरल्या.

मोठी बातमी! लोकसभेत महिला आरक्षण विधेयक फेटाळले; २३० खासदारांनी विरोधात मतदान केले 

इराणचे परराष्ट्र मंत्री अब्बास अराघची यांनी होर्मुझची सामुद्रधुनी खुली करण्याची घोषणा करताच तेलाच्या किमती जवळपास ९ टक्क्यांनी घसरल्या. त्यांनी सांगितले की, युद्धविराम संपेपर्यंत होर्मुझची सामुद्रधुनी सर्व व्यापारी जहाजांसाठी खुली राहील.

यानंतर, जागतिक कच्च्या तेलाचा बेंचमार्क असलेल्या ब्रेंट क्रूड फ्युचर्समध्ये ८.४६ डॉलरची, म्हणजेच ८.५ टक्क्यांची घसरण होऊन ते प्रति बॅरल ९०.९३ डॉलरवर आले. दरम्यान, अमेरिकेच्या वेस्ट टेक्सास इंटरमीडिएट क्रूड फ्युचर्समध्ये ८.८७ डॉलरची, म्हणजेच ९.४ टक्क्यांची घसरण होऊन ते प्रति बॅरल ८५.८२ डॉलरवर आले.

युरोपच्या बेंचमार्क गॅस करारातही सुमारे ८.५ टक्क्यांची मोठी घसरण झाली. दरम्यान, अमेरिकेचे राष्ट्राध्यक्ष डोनाल्ड ट्रम्प यांनी म्हटले आहे की, इराणमधील युद्ध संपवण्यासाठी लवकरच एक करार होऊ शकतो. पण, यामुळे गॅससह तेलाचे दरही घसरु शकतात.होर्मुझची सामुद्रधुनी खुली झाल्याने भारताला मोठा दिलासा 

जगातील सुमारे २० टक्के तेल आणि वायूची वाहतूक होर्मुझच्या सामुद्रधुनीतून होते. होर्मुझची सामुद्रधुनी खुली झाल्याने भारताला मोठा दिलासा मिळाला आहे, कारण देशाच्या एकूण कच्च्या तेलाच्या आयातीपैकी ४०-५० टक्के तेल आखाती देशांकडून इराक, सौदी अरेबिया, संयुक्त अरब अमिरात आणि कुवेत होर्मुझमार्गे येते.

युद्धादरम्यान होर्मुझच्या सामुद्रधुनीतील नाकेबंदीमुळे, मार्च २०२६ मध्ये भारताची एकूण कच्च्या तेलाची आयात अंदाजे १५ टक्क्यांनी घटली. यामुळे भारताला पुन्हा एकदा रशियाकडे वळावे लागले. परिणामी, रशियाकडून होणारी आयात ९० टक्क्यांनी वाढून प्रतिदिन १.९-२ मिलियन बॅरलवर पोहोचली.