खासदार नीलेश लंके पुण्यातील रुग्णालयात दाखल; प्रकृती स्थिर, उपचार सुरू

नीलेश लंके यांना व्हायरल ताप व निर्जलीकरणाचा त्रास झाल्याने पुण्यातील रूबी हॉल क्लिनिकमध्ये दाखल करण्यात आले आहे

पुणे : अहिल्यानगर लोकसभा मतदारसंघातील राष्ट्रवादी काँग्रेसचे (शरद पवार गट) खासदार नीलेश लंके यांना व्हायरल ताप व निर्जलीकरणाचा त्रास झाल्याने पुण्यातील रूबी हॉल क्लिनिकमध्ये दाखल करण्यात आले आहे. सध्या त्यांची प्रकृती स्थिर असल्याची माहिती रुग्णालय प्रशासनाने दिली.

अस्वस्थ वाटत असल्या कारणास्तव खासदार लंके यांना यापूर्वी अहिल्यानगर येथील खासगी रुग्णालयात उपचारासाठी दाखल करण्यात आले होते. मात्र, प्रकृतीत अपेक्षित सुधारणा न झाल्याने अधिक दक्षता म्हणून त्यांना पुढील उपचारासाठी पुण्यात हलविण्यात आले. रूबी हॉल क्लिनिकमध्ये अतिदक्षता विभागाच्या संचालक डॉ. प्राची साठे यांच्या मार्गदर्शनाखाली त्यांच्यावर उपचार सुरू आहेत. वैद्यकीय पथकाकडून त्यांच्या प्रकृतीवर सातत्याने लक्ष ठेवण्यात येत असून आवश्यक तपासण्या सुरू असल्याचे सांगण्यात आले. सध्या लंके यांची प्रकृती स्थिर असून डॉक्टरांनी त्यांना काही दिवस विश्रांती घेण्याचा सल्ला दिला आहे.