जालन्यात मनसे आक्रमक! ॲड. गुणरत्न सदावर्तेंच्या गाडीवर ओतली शाई, सुपाऱ्या फेकल्या

जालन्यात मनसे सैनिकांनी सदावर्तेंचा ताफा रोखला; कार्यकर्त्यांची जोरदार घोषणाबाजी.

जालना: महाराष्ट्र नवनिर्माण सेनेचे प्रमुख राज ठाकरे यांच्यावर टीका करणाऱ्या ॲड. गुणरत्न सदावर्ते यांना जालन्यात मनसे सैनिकांच्या रोषाला सामोरे जावे लागले. शनिवारी दुपारी सदावर्ते यांचा ताफा जालना शहरातील छत्रपती संभाजीनगर चौफुलीजवळून जात असताना, दबा धरून बसलेल्या कार्यकर्त्यांनी त्यांच्या गाडीवर काळी शाई आणि ऑइल, सुपाऱ्या फेकून जोरदार निषेध नोंदवला.

नेमकी घटना काय?
ॲड. सदावर्ते हे शनिवारी जालना दौऱ्यावर असताना मानदेऊळगावकडे जात होते. छत्रपती संभाजीनगर चौफुलीजवळ त्यांच्या गाड्यांचा ताफा येताच मनसे कार्यकर्त्यांनी घोषणाबाजी करत ताफा अडवण्याचा प्रयत्न केला. यावेळी कार्यकर्त्यांनी त्यांच्या गाडीवर काळे ऑइल फेकले. राज ठाकरे यांनी मराठी भाषेच्या मुद्द्यावर घेतलेल्या आक्रमक भूमिकेला सदावर्ते सातत्याने विरोध करत असल्याने, कार्यकर्त्यांनी हे पाऊल उचलल्याचे बोलले जात आहे.

जालन्यात मनसे सैनिकांकडून ॲड. गुणरत्न सदावर्तेंचा ताफा रोखण्याचा प्रयत्न, गाडीवर ओतलं काळं ऑइल आणि शाई #jalana#marathwadapic.twitter.com/itm3RKHFmZ

— Lokmat Chhatrapati Sambhajinagar (@milokmatabd) May 9, 2026

पोलिसांची कारवाई
या घटनेनंतर परिसरात मोठा पोलीस बंदोबस्त तैनात करण्यात आला आहे. पोलिसांनी तातडीने हालचाली करत घोषणाबाजी करणाऱ्या काही मनसे कार्यकर्त्यांना ताब्यात घेतले आहे. या प्रकारामुळे राजकीय वर्तुळात मोठी खळबळ उडाली असून, परिसरात काही काळ तणावाचे वातावरण होते.