राज्यभरात चोरीचे शंभरहून अधिक गुन्हे दाखल; पुण्यातून चोरटा अखेर गजाआड

पुणे जिल्हा, कोल्हापूर, सातारा, छत्रपती संभाजीनगर, अहिल्यानगर, पिंपरी-चिंचवड शहर परिसरात या चोरट्याने गुन्हे केले आहेत

पुणे : शहरासह राज्यभरात चोरीचे शंभरहून जास्त गुन्हे दाखल असलेल्या सराईताला अलंकार पोलिसांनी अटक केली. चोरट्याने कारच्या काचा फोडून ऐवज चोरल्याचे उघड झाले असून, त्याच्याकडून १२ लाख १८ हजार रुपयांचा मुद्देमाल जप्त करण्यात आला आहे. राजू बाबूराव जावळकर (वय ५७, रा. डोणजे फाटा, सिंहगड रोड) असे अटक करण्यात आलेल्याचे नाव आहे.

एरंडवणे, कोथरूड परिसरात कारच्या काचा फोडून ऐवज चोरून नेण्याच्या घटना वाढल्या होत्या. चोरट्यांनी रोख रकमेसह दागिने, इलेक्ट्राॅनिक्स वस्तू चोरल्या होत्या. याप्रकरणी अलंकार पोलिस ठाण्यात गुन्हे दाखल झाले होते. अलंकार पोलिसांनी तपास सुरू केला. एरंडवणे, कोथरूड भागातील सीसीटीव्ही कॅमेऱ्यांचे फुटेज तपासले. तपासात मिळालेल्या माहितीनुसार, पोलिसांनी जावळकरला ताब्यात घेतले. त्याच्याकडून सोन्याचे दागिने, लॅपटाॅप, दोन मोबाइल, रोख रक्कम आणि दुचाकी, असा १२ लाख १८ हजार रुपयांचा मुद्देमाल जप्त करण्यात आला.

जावळकरने पुणे शहर, जिल्हा, तसेच कोल्हापूर, सातारा, छत्रपती संभाजीनगर, अहिल्यानगर, पिंपरी-चिंचवड शहर परिसरात गुन्हे केले आहेत. त्याच्याविरोधात चोरीचे शंभरहून जास्त गुन्हे दाखल झाले आहेत. वरिष्ठ पोलिस निरीक्षक उल्हास कदम, पोलिस निरीक्षक स्मिता पाटील, उपनिरीक्षक गणेश दीक्षित, महेश निंबाळकर, धीरज पवार, सोमेश्वर यादव, माधुरी कुंभार, राकेश क्षीरसागर, शिवाजी शिंदे, आशिष राठोड, विशाल मोरे यांनी ही कारवाई केली.