पिंपरी शहरात मेट्रो आली; पण सहापैकी केवळ दोनच स्थानकांवर फिडर बसची सुविधा

- प्रवाशांचा प्रवास खडतर : उद्योगनगरीत ‘कनेक्टिव्हिटी’चा प्रश्न गंभीर; घरापासून स्थानकापर्यंत आणि परत घरापर्यंत जायचे कसे?; रिक्षा आणि कॅबच्या अवाच्या सव्वा भाड्याने नागरिक हैराण

- रवींद्र जगधने
 
पिंपरी : मेट्रोमुळे उद्योगनगरीतील प्रवाशांचा प्रवास सुखद झाला असला, तरी ‘लास्ट माइल कनेक्टिव्हिटी’चा प्रश्न अद्याप सुटलेला नाही. शहरातील सहा प्रमुख स्थानकांपैकी केवळ पीसीएमसी आणि नाशिक फाटा येथेच फिडर बसची तोकडी सेवा उपलब्ध आहे. परिणामी, मेट्रोचे ३० रुपयांचे तिकीट काढून प्रवास करणाऱ्या प्रवाशांना स्थानकापासून घरापर्यंत जाण्यासाठी रिक्षाला १०० ते ३५० रुपये मोजावे लागत आहेत.

फिडर बसच्या अभावामुळे प्रवाशांची लूट होत आहे. पिंपरी-चिंचवडमधून मेट्रोला मिळणारा प्रतिसाद दिवसेंदिवस वाढत आहे. दररोज हजारो प्रवासी पीसीएमसी स्थानकापासून पुण्यातील विविध मार्गावर प्रवास करतात. मात्र, घरापासून स्थानकापर्यंत आणि परत या मार्गावर वाहतूक नसल्याने मेट्रोच्या प्रवासी संख्येत अपेक्षित वाढ होत नसल्याचे तज्ज्ञांचे मत आहे.
 
कनेक्टिव्हिटी केवळ कागदावरच ?

शहरात मेट्रो मार्गावर पीसीएमसी, संत तुकारामनगर, नाशिक फाटा, कासारवाडी, फुगेवाडी आणि दापोडी ही स्थानके आहेत. मात्र, काळेवाडी फाटा फिडरसाठी केवळ चार बस कार्यरत आहेत. पीसीएमसी स्थानकावरून पूर्वी मुकाई चौक आणि रावेतसाठी असलेली बससेवा आता वाल्हेकरवाडीपर्यंत मर्यादित केल्याने रावेत-किवळेकरांची कोंडी झाली आहे. तेथे बसची वारंवारिता कमी आहे, तेथे प्रवाशांना नाइलाजास्तव रिक्षा किंवा कॅब, खासगी प्रवासी वाहतुकीचा आधार घ्यावा लागतो.

---

पीसीएमसी मेट्रो स्थानकावरून उपनगरांतील रिक्षा भाडे (रुपयांत)

उपनगर                                     - दिवसाचे भाडे                         - रात्रीचे भाडे

चिखली                                     -             २००                         - ३००

कुदळवाडी                         -             १५०                         - २५०
काळेवाडी, आकुर्डी, चिंचवड -             १००                         -            १५०

रावेत, ताथवडे, पुनावळे, वाकड -             २००                                    -             ३००
भोसरी                                     -             १५०                                     -             २००

दिघी                                     -             २५०                                     -            ३५०
---- 

फिडर सेवेच्या अभावामुळे निर्माण झालेले प्रश्न

चिंचवडगाव, थेरगाव, रहाटणी, पिंपळे सौदागर, वाकड, पिंपळे गुरव, पिंपळे निलख, रावेत, किवळे यांसारख्या मोठ्या उपनगरांतून मेट्रो स्थानकापर्यंत येण्यासाठी थेट पुरेशी सार्वजनिक वाहतुकीची सुविधा नाही. मेट्रोने कमी वेळात प्रवास होतो; पण पुरेशी फिडर बस नसल्याने स्थानकावरून घरी पोहोचण्यास ३० ते ४० मिनिटे लागतात. रात्रीच्या वेळी मेट्रोने उतरणाऱ्या महिला आणि ज्येष्ठ नागरिकांना फिडर सेवा नसल्याने अंधाऱ्या मार्गावरून रिक्षाने जावे लागते.

फिडर नसलेल्या भागात कशाचा आधार?

ज्या स्थानकांपर्यंत बस नाही, तिथे नागरिक स्वतःच्या दुचाकी किंवा चारचाकीने येतात. मात्र, मेट्रो स्थानकांवर पार्किंगची पुरेशी व्यवस्था नसल्याने वाहने रस्त्यावर उभी करावी लागतात. मेट्रोचे तिकीट ३० रुपये असले, तरी स्थानकापासून घरापर्यंत जाण्यासाठी रिक्षाचालक १०० ते ३५० रुपये आकारतात. हे भाडे सर्वसामान्य प्रवाशांना परवडणारे नाही.

...........

पीसीएमसी व नाशिक फाटा मेट्रो स्थानकावरून सुरू असलेली फिडर सेवा

मार्ग क्र.            -             ठिकाण (पासून - पर्यंत)             - पहिली बस - शेवटची बस - वारंवारिता

३५६             -             नाशिक फाटा ते सेक्टर १२ - ६ः२०            - ८ः१५             - १ तास ५० मि.

मेट्रो ३१            -             पिंपरी मेट्रो ते काळेवाडी फाटा - ६ः३० - ९ः३०             - १५ मि.
मेट्रो ३२ -             निगडी ते नाशिक फाटा             - ८ः१५ - ६ः४५             - १ तास ३० मि.

पी १३             -             पिंपरी मेट्रो ते वाल्हेकरवाडी - ६ः१५ - १०             - १ तास ३० मि.
बी १             -             दिघी ते पिंपरी मेट्रो             - ७ः१५ - ९ः२५             - १ तास ३५ मि.

---------

फिडर बस सेवेचे नियोजन ‘पीएमपीएमएल’च्या माध्यमातून केले जाते. ज्या मार्गांवर प्रवाशांची संख्या जास्त आहे, तेथे बसची संख्या आणि वारंवारिता वाढवण्याबाबत सकारात्मक चर्चा सुरू आहे.  - चंद्रशेखर तांबवेकर, जनसंपर्क अधिकारी, ‘महामेट्रो.’ 

 

मेट्रो स्थानकावरून पिंपरी-चिंचवडमधील अंतर्गत भागात जाण्यासाठी आम्ही बसच्या फेऱ्यांचे काटेकोर नियोजन केले आहे. नागरिकांनी खासगी वाहनांऐवजी या सार्वजनिक वाहतूक व्यवस्थेचा अधिकाधिक लाभ घ्यावा. -किशोर चौहान, जनसंपर्क अधिकारी, ‘पीएमपीएमएल’