Numerology: तुमची जन्मतारीख सांगेल तुमची 'ती' एक सवय; ज्यामुळे लोक तुमच्यावर होतात नाराज!

Numerology: अंकशास्त्रानुसार तुमचा जन्मांक किंवा 'मुलांक' तुमच्या व्यक्तिमत्त्वाचे अनेक पैलू उलगडत असतो. ज्याप्रमाणे तुमच्या मुलांकावरून तुमचे चांगले गुण समजतात, त्याचप्रमाणे तुमच्या काही अशा सवयीही समोर येतात ज्यामुळे इतरांना तुमचा त्रास होऊ शकतो. मुलांकावरून जाणून घेऊया तुमच्या त्या वाईट सवयीविषयी!

मुलांक १ (ज्यांचा जन्म १, १०, १९, २८ तारखेला झाला आहे)

या मुलांकाचा स्वामी सूर्य आहे. या लोकांमध्ये नेतृत्वगुण चांगले असतात, पण कधीकधी ते खूप अहंकारी वाटू शकतात. "मी म्हणेन तीच पूर्व दिशा" ही त्यांची वृत्ती आणि इतरांवर हुकूमत गाजवण्याची सवय समोरच्या व्यक्तीला त्रासदायक ठरू शकते.

मुलांक २ (ज्यांचा जन्म २, ११, २०, २९ तारखेला झाला आहे)

यांचा स्वामी चंद्र आहे. हे लोक स्वभावाने खूप हळवे असतात. त्यांची सर्वात मोठी वाईट सवय म्हणजे अति विचार करणे (Overthinking) आणि सतत बदलणारे मूड्स. त्यांच्या सततच्या तक्रारींमुळे किंवा भावनिक अस्थिरतेमुळे जवळचे लोक कंटाळू शकतात.

मुलांक ३ (ज्यांचा जन्म ३, १२, २१, ३० तारखेला झाला आहे)

यांचा स्वामी गुरु आहे. हे लोक ज्ञानी असतात, पण त्यांना विनाकारण सल्ले देण्याची सवय असते. कोणाशीही बोलताना आपणच जास्त हुशार आहोत, असे भासवण्याच्या त्यांच्या प्रयत्नामुळे इतर लोक त्यांच्यापासून दूर राहणे पसंत करतात.

मुलांक ४ (ज्यांचा जन्म ४, १३, २२, ३१ तारखेला झाला आहे)

यांचा स्वामी राहू आहे. हे लोक खूप हट्टी असतात. कोणत्याही विषयावर विनाकारण वाद घालणे आणि आपलीच बाजू खरी करून दाखवणे, ही त्यांची सवय इतरांना खूप चीड आणणारी ठरू शकते.

मुलांक ५ (ज्यांचा जन्म ५, १४, २३ तारखेला झाला आहे)

यांचा स्वामी बुध आहे. हे लोक खूप चपळ असतात, पण त्यांच्यात एकाग्रतेचा अभाव असतो. एका जागी किंवा एका कामावर न टिकणे आणि सतत घाईत असणे, यामुळे त्यांच्यासोबत काम करणाऱ्यांना ताण येऊ शकतो.

मुलांक ६ (ज्यांचा जन्म ६, १५, २४ तारखेला झाला आहे)

यांचा स्वामी शुक्र आहे. हे लोक आनंदी असतात, पण त्यांना इतरांच्या खासगी आयुष्यात ढवळाढवळ करण्याची सवय असू शकते. तसेच, दिखाव्यावर जास्त खर्च करणे किंवा इतरांनी आपल्या सौंदर्याचेच कौतुक करावे, अशी अपेक्षा ठेवणे इतरांना खटकू शकते.

मुलांक ७ (ज्यांचा जन्म ७, १६, २५ तारखेला झाला आहे)

यांचा स्वामी केतू आहे. हे लोक थोडे गूढ स्वभावाचे असतात. कोणावरही लवकर विश्वास न ठेवणे आणि संशयी वृत्ती बाळगणे ही त्यांची वाईट सवय आहे. त्यांच्या अबोलपणामुळे समोरच्या व्यक्तीला त्यांचा नेमका स्वभाव समजत नाही.

मुलांक ८ (ज्यांचा जन्म ८, १७, २६ तारखेला झाला आहे)

यांचा स्वामी शनि आहे. हे लोक खूप मेहनती असतात, पण स्वभावाने थोडे कडक आणि गंभीर असतात. त्यांच्या अति शिस्तीमुळे आणि भावना व्यक्त न करण्याच्या सवयीमुळे लोक त्यांना "कोरडे" किंवा "रागीट" समजतात.

मुलांक ९ (ज्यांचा जन्म ९, १८, २७ तारखेला झाला आहे)

यांचा स्वामी मंगळ आहे. या लोकांचा राग त्यांच्या नाकावर असतो. छोटीशी गोष्टही त्यांना खूप राग आणू शकते. त्यांच्या आक्रमक बोलण्यामुळे अनेकदा त्यांचे मित्र आणि नातेवाईक दुखावले जातात.