नंदुरबार : जिल्हा रुग्णालयात दरवर्षी तीन हजारापेक्षा अधिक नेत्ररुग्णांच्या शस्त्रक्रिया होऊन दृष्टी दिली जात होती. परंतु कोरोनामुळे या शस्त्रक्रियांना ब्रेक लागला असून २०२०-२१ या वर्षात केवळ १३८ शस्त्रक्रियाच होऊ शकल्या आहेत. कोरोनामुळे रुग्णालय प्रशासनाच्या कामावर बोजा वाढल्याने ही स्थिती निर्माण झाली आहे.
एप्रिल २०२० मध्ये पहिला रुग्ण आढळून आल्यानंतर त्याच्यावर उपचार करण्यासाठी जिल्हा रुग्णालयातील नेत्ररुग्ण कक्ष खुला करण्यात आला होता. या ठिकाणी गंभीर कोरोना रुग्णांना दाखल करण्यात येते. यातून मोतीबिंदू शस्त्रक्रिया झालेल्यांना जागाच शिल्लक नसल्याने जिल्ह्याचा मोतीबिंदू शस्त्रक्रियेचा आकडा हा खालावला आहे. येत्या काळात ही संख्या वाढवण्याचा प्रयत्न करण्यात येणार असल्याची माहिती देण्यात आली आहे. परंतु तूर्तास मोतीबिंदू शस्त्रक्रियांसाठी थांबलेल्या सुमारे अडीच हजार ज्येष्ठांचे काय, असा प्रश्नही उपस्थित होत आहे.
कोरोनाबाधितांसाठी सुरुवातीपासून नेत्रकक्षाचा वापर होतो आहे. यामुळे त्याठिकाणी इतर रुग्णांना ठेवता येणार नाही. नेत्र शस्त्रक्रिया करण्यासाठी येणारे बहुतांश रुग्ण हे वृद्ध असल्याने कोरोनाचा संसर्ग होऊ शकतो. येत्या काळात स्वतंत्र व्यवस्था करण्यावर भर राहील.
-डाॅ. के. डी. सातपुते, अतिरिक्त जिल्हा शल्यचिकित्सक, नंदुरबार.
एका डोळ्यात माेतीबिंदू आहे. त्याची शस्त्रक्रिया गरजेची आहे. खासगी दवाखान्यात खर्च होतो. सिव्हिलमध्ये मोफत शस्त्रक्रिया होते. यातून बऱ्याच अडचणी दूर होतात. परंतु कोरोनाची लागण होण्याची भीती वाटते.
-यमुनाबाई ठाकरे, तळोदा,
एका डोळ्याने अंधूक दिसते. मोतीबिंदू काढायचा आहे. आता उन्हाळा असल्याने टाळले आहे. परंतु मुलांनी सिव्हीलमध्ये तपास केली असता कोरोनामुळे शस्त्रक्रिया करणे धोकादायक असल्याचे सांगितले. मोफत शिबिरही होत नाही.
-कमलबाई पवार, नंदुरबार.
खासगी रुग्णालयांमध्ये शस्त्रक्रिया करणे खर्चिक असल्याने माझ्यासारखे ज्येष्ठ जिल्हा रुग्णालयात जातात. आता त्या ठिकाणी कोरोना रुग्णांवर उपचार होत आहेत. यातून संसर्गाची भीती आहे. म्हणून ऑपरेशन टळले.
-अशोक पाटील, तळोदा.