नंदुरबार : जिल्ह्यात १८ ते ४४ वयोगटातील नागरीकांचे लसीकरण १ मेपासून सुरू आहे. या वयोगटातून नोंदणीला उत्स्फूर्त प्रतिसाद आहे. परंतू लसीकरणासाठी नोंदणी करताना मात्र असंख्य अडचणी येत असून मोबाईल ॲप आणि पोर्टल हे सायंकाळी सात वाजता सुरू झाल्यानंतर अवघ्या काही मिनिटातच नोंदण्या पूर्ण होऊन बंद होत आहे. यातून लस घेण्यासाठी इच्छुकांच्या उत्साहावर पाणी फेरले जात आहे.
जिल्ह्यात आजअखेरीस १ लाख ८७ हजार नागरिकांना लस देण्यात आली आहे. जिल्ह्यातील सर्व वयोगटाकडून लस घेण्यास प्रतिसाद देण्यात येत आहे. आरोग्य विभागाने निर्माण केलेल्या ४४ केंद्रांवर दररोज नागरिक गर्दी करत असले तरी १८ ते ४४ या गटातील नागरिकांना मात्र नोंदणी करण्यासाठी समस्यांचा सामना करावा लागत आहे. ऑनलाईन पद्धतीने नोंदणी करण्यासाठी मोबाईल ॲप ओपन केल्यानंतर मोबाईल क्रमांक टाकल्यावर येणारा ओटीपीच येत नसल्याने पुढची प्रक्रिया पूर्ण होत नाही. ज्यांना ओटीपी आला तो सबमिट केल्यानंतर पुढील पेज ओपन होत नसल्याची माहिती दिली गेली आहे.
दुर्गम भागात उशिराने तरीही फुल्ल
आरोग्य विभागाने धडगाव व अक्कलकुवा या दोन तालुक्यातील नागरिकांच्या सोयीसाठी रात्री उशिराने ॲपवर नोंदणीची सोय करुन दिली आहे. परंतु या ठिकाणी इतर गावांतील नागरिक नोंदणी करून लसीकरण करत असल्याची माहिती देण्यात आली आहे. दुसरीकडे सपाटीच्या तालुक्यांमध्ये तसेच शहरांमध्ये सायंकाळी सातवाजेपासूनच अनेक जण कामाला लागत आहेत. नोंदणी व्हावी यासाठी अनेक जण मोकळ्या जागा आणि टेरेसचा आधार घेत थांबून राहतात. तरीही नोंदणी होत नसल्याचे सांगण्यात आले.
गेल्या आठवडाभरापासून प्रयत्न सुरू आहे. दररोज सायंकाळी साडेसहापासून ॲप ओपन करून ठेवतो. नोंदणी सुरू केल्यानंतर काही वेळात ते हँग होण्यास सुरुवात होते. अर्धीअधिक माहिती भरली असताना बाहेर आले की, पुन्हा नव्याने नोंदणी होत नाही. तरीही प्रयत्न सुरू आहे.
- सुनील पावरा, नंदुरबार
घरातील वृद्ध आईचे लसीकरण करायचे आहे. यासाठी ॲप शिकून घेत डाऊनलोड केले आहे. १० दिवसांपासून दररोज सायंकाळी ॲप ओपन करतो. परंतु नोंदणीच होत नाही. नेटवर्कची समस्या नाही. परंतु वारंवार ॲप हँग हाेते. मोबाईल नंबर टाकल्यानंतर पुढे काहीच होत नाही.
-कैलास मराठे, नंदुरबार.
दुर्गम भागात मोबाईल नेटवर्क ही सर्वात मोठी समस्या आहे. रात्रीच्यावेळी सर्व टाॅवर सुरू राहत असल्याने नेटवर्क बरे असते. यातून नोंदणीसाठी ॲपचा वापर केल्यावर ॲप ओपनच होत नसल्याचा अनुभव आहे. मोबाईल नंबर टाकल्यानंतर ओटीपी येत नाही.
-राकेश पावरा, धडगाव.
जिल्ह्याच्या लसीकरणाचा जो कोटा आहे त्यानुसार नोंदणी सुरू आहे. या नोंदणीत नागरिकांना अडचणी येत आहेत. परंतु ही समस्या संपूर्ण राज्यात सुरू आहे. एकाच वेळी असंख्य युझर्स ॲप ओपन करत असल्याने त्या अडचणी येतात. तरीही जिल्ह्यातील नागरीकांच्या समस्या सोडवण्याचा प्रयत्न करत आहे.
- डाॅ. एन. डी. बोडक, जिल्हा आरोग्य अधिकारी, नंदुरबार.