नंदुरबार : जिल्ह्यात मास्कचा वापर न करता सार्वजनिक ठिकाणी भटकंती करणाऱ्यांवर कारवाई करण्यात येत आहे. यांतर्गत मोलगी, विसरवाडी, तळोदा, सारंगखेडा, उपनगर, अक्कलकुवा, नवापूर, धडगाव, म्हसावद, शहादा, नंदुरबार तालुका पोलीस ठाण्यांतर्गत १४ जणांवर कलम २४८, २६९ व २९० नुसार गुन्हे दाखल करण्यात आले आहेत.
जयचंद नगरात रस्त्याचे खोदकाम
नंदुरबार : शहरातील जयचंद नगरात नव्याने तयार करण्यात आलेल्या रस्त्यावर काही दिवसांपूर्वी खोदकाम करण्यात आले होते. काम पूर्ण झाल्यानंतर मात्र रस्ता योग्य पद्धतीने बुजवला गेला नसल्याने नागरिकांचे हाल होत आहेत. या ठिकाणी माती जमिनीत जात असल्याने खड्ड्याचा आकार वाढत आहे. याकडे पालिका प्रशासनाने लक्ष देऊन कारवाई करण्याची गरज आहे.
अक्षय तृतीयमुळे बाजारात पुन्हा गर्दी
नंदुरबार : येत्या दोन दिवसांवर अक्षय तृतीया आली आहे. यातून खरेदीसाठी नागरिक बाजारात येत आहेत. अक्षय तृतीयेला होणाऱ्या धार्मिक विधींसाठी लागणाऱ्या साहित्याची सर्वाधिक खरेदी होत आहे. यात प्रामुख्याने मातीचे छोटे मडके, डांगर यासह विविध वस्तूंची खरेदी होत असल्याचे दिसून आले आहे.
अवैध व्यवसाय थांबवण्याची मागणी
नंदुरबार : शहरातील काशिबा गुरव चाैक ते गुरुकुल चाैकादरम्यान अवैध गावठी मद्यविक्री होत असल्याचे दिसून आले आहे. याकडे पोलीस प्रशासनाने लक्ष देण्याची मागणी आहे. उशिरापर्यंत येथे मद्यपी हिंडत असल्याने सामान्यांना त्रास होत आहे.