लोकमत न्यूज नेटवर्क
नागपूर : महाराष्ट्र शासनाने कोविड रुग्णालयांचे दर निश्चित केले आहेत. असे असतानाही पारडी रोडवरील रेडियन्स रुग्णालयाने ९२ कोविड रुग्णांकडून एकाच चाचणीसाठी वेगवेगळे दर आकारून १०.३२ लाखाची जादाची रक्कम वसूल केली. वसूल करण्यात आलेली जादाची रक्कम परत करण्याचे आदेश मनपाचे अतिरिक्त आयुक्त जलज शर्मा यांनी दिले आहेत.
खासगी कोविड रुग्णालयातील ८० टक्के बेडवर दाखल करण्यात येणाऱ्या रुग्णांचे दर निश्चित केले आहेत. या नियमाचे पालन करणे खासगी रुग्णालयांना बंधनकारक आहे. परंतु रेडियन्स रुग्णालयात एकाच चाचणीसाठी ९२ रुग्णांकडून वेगवेगळे दर आकारून १० लाख ३२ हजार २४३ रुपये जादा वसूल केल्याचे चौकशीत स्पष्ट झाले. या संदर्भात दोन दिवसात स्पष्टीकरण देण्याचे निर्देश दिले होते. परंतु रुग्णालयाने या संदर्भात कोणत्याही स्वरूपाचे स्पष्टीकरण दिले नाही. त्यामुळे रुग्णांना सात दिवसात वसूल करण्यात आलेली जादा बिलाची रक्कम परत करून याबाबतचा अनुपालन अहवाल पाठविण्याचे निर्देश शर्मा यांनी रेडियन्स रुग्णालयाला दिले आहेत. रक्कम परत न केल्यास कायद्यानुसार कारवाई करण्याचा इशारा दिला आहे.
....
अन्य रुग्णालयांच्याही तक्रारी
रेडियन्स रुग्णालयाप्रमाणे अन्य कोविड खासगी रुग्णालयांनीही रुग्णांकडून जादा बिल वसूल केल्याच्या तक्रारी आहेत. चौकशीनंतर अशा रुग्णालयांवर कारवाई होण्याची शक्यता आहे.