“मुंबईत ठाकरेंचे काही चालणार नाही, उद्धव यांनी राज यांना सोबत घेऊन चूक केली”; कुणाचा दावा?

Local Body Election 2025 Maharashtra: केवळ काही ठिकाणच्या मराठी मतांचा ठाकरे बंधूंना फायदा होईल, असा दावा केंद्रीय मंत्र्यांनी केला आहे.

Local Body Election 2025 Maharashtra: मुंबईत ठाकरे बंधूंचे काही एक चालणार नाही. उद्धव ठाकरे यांनी राज ठाकरे यांना सोबत घेऊन चूक केली आहे. बाळासाहेब ठाकरे यांचा ‘ऑल इंडिया’चा अजेंडा होता. उत्तर भारतीय आघाडी, गुजराती आघाडी, साऊथ इंडियन आघाडी, मुस्लिम मायनॉरिटी आघाडी अशा अनेक आघाड्या बनवल्या होत्या आणि त्याचा मोठा परिणाम झाला होता. सगळी मराठी मते मिळतील, अशा भ्रमात त्यांनी राहू नये. केवळ काही ठिकाणच्या मराठी मतांचा त्यांना फायदा होईल, या शब्दांत केंद्रीय मंत्री रामदास आठवले यांनी ठाकरे बंधूंना टोला लगावला.

पत्रकारांशी बोलताना रामदास आठवले म्हणाले की, राज्यातील महापालिका निवडणुका महायुती म्हणून लढविल्या जाणार आहेत आणि त्यामध्ये रिपब्लिकन पक्षाला योग्य जागा मिळाव्यात. मुंबई महापालिकेत १७ ते १८ तर पुणे महापालिकेत २० जागा मिळाव्यात अशी त्यांची अपेक्षा आहे. मुंबई महापालिका निवडणुकीत ठाकरे बंधूंना मोठा झटका देण्याची त्यांच्यावर मोठी जबाबदारी आहे, असेही त्यांनी सांगितले.

योग्य प्रतिनिधित्व द्यावे

महायुतीसोबत नैसर्गिक युती असलेल्या भारतीय जनता पक्षाच्या स्थानिक नेत्यांनी त्यांच्या स्थानिक नेत्यांशी निवडणुकीसंदर्भात चर्चा करावी आणि योग्य प्रतिनिधित्व द्यावे. या संदर्भात मुख्यमंत्री देवेंद्र फडणवीस आणि भाजप प्रदेशाध्यक्ष रवींद्र चव्हाण यांच्याशी चर्चा करणार असल्याचेही रामदास आठवले यांनी म्हटले आहे. 

दरम्यान, स्थानिक स्वराज्य संस्था निवडणुकीचा प्रचार शिगेला पोहोचू लागला असून, आता वादग्रस्त विधान अन् वार-पलटवारांनी राजकीय मैदान गाजू लागले आहे. नगरांच्या निवडणुकीत वादाचे नगारे वाजत आहेत. महायुतीतील अनेक नेते एकमेकांवर आरोप-प्रत्यारोप करताना पाहायला मिळत आहेत.