शिवसेना मांडणार राज्याचा विकास आराखडा

येऊ घातलेल्या विधानसभा निवडणुकीत यश मिळाल्यानंतर शिवसेना कोणती कामे हाती घेईल, याचा विकास आराखडा तयार करण्याचे काम वेगाने सुरू झाले आहे

अतुल कुलकर्णी, मुंबईयेऊ घातलेल्या विधानसभा निवडणुकीत यश मिळाल्यानंतर शिवसेना कोणती कामे हाती घेईल, याचा विकास आराखडा तयार करण्याचे काम वेगाने सुरू झाले आहे. काँग्रेस राष्ट्रवादीने राज्याचे वाटोळे केले, आम्ही ते होऊ देणार नाही, असे सांगत अन्य कोणत्याही पक्षाच्या आधी शिवसेना आपली विकासाची ब्लू प्रिंट जनतेसमोर ठेवणार आहे. मिळालेल्या माहितीनुसार राज ठाकरे यांच्या ब्लू प्रिंटच्या आधीच ही पुस्तिका तयार केली जाणार आहे.उद्धव ठाकरे हेच मुख्यमंत्री पदाचे उमेदवार असतील, असा एका ओळीचा ठराव उद्या होणाऱ्या राज्यस्तरीय मेळाव्यात मांडला जाईल, ज्यावर शिवसेना नेते शिक्कामोर्तब करतील. आजपासून शिवसेनेच्या मेळाव्याला सुरुवात झाली. आज माध्यमांना सभागृहात प्रवेश नव्हता. उद्या सकाळी आदित्य ठाकरे भाषण करतील तर दुपारी उद्धव यांचे भाषण होईल. गाव तेथे शिवसेना, घर तेथे भगवा, असे नारेदेखील उद्या राज्यभर नेण्याचे आदेश दिले जातील. आता भाजपाच्या मतदारसंघांत देखील उद्धव दौरा करतील. येत्या २३ जून ते २४ जुलै या दरम्यान उद्धव ठाकरे अमरावती, नागपूर, औरंगाबाद, जळगाव, पुणे, रत्नागिरी आणि पालघर येथे जाहीर सभा घेणार आहेत. शिवसेनेने राज्याचा विकास आराखडा तयार केला असून, त्याचे सादरीकरण उद्याच्या मेळाव्यात केले जाऊ शकते. तसे न झाल्यास त्याच्या पुस्तिका बनवण्याची योजना आहे. जिल्हाजिल्ह्यातील प्रलंबित विकासाचे अनेक प्रकल्प त्यात मांडले जाणार आहेत. शिवाय अनेक जिल्ह्यांत नवनवीन कोणत्या गोष्टी केल्या जातील याचीही माहिती त्यातून दिली जाणार आहे. उद्याच्या मेळाव्यात उद्धव ठाकरे विधानसभा निवडणूक प्रचाराचे बिगुल वाजवतील आणि त्यातून बऱ्याच गोष्टी स्पष्ट होतील.